Sigida 13 Bana minnu bɛ mɔgɔ minɛ ka caya

Ɛrini

Ɛrini ye fasasira dɔ dayɛlɛli ye min bɛ furu lamini na. A ka ca a la ale bɛ sɔrɔ fɛn girimanw tali fɛ walima fangalabaara (i n’a fɔ jigini). Den dɔw ni ɛrini bɛ wolo (aw ye sɛbɛn ɲɛ Barakun bonya lajɛ). Cɛw la, ɛrini ka teli ka kɛ olu worokɔrɔla de la.

A ka ca a la, ɛrini ka teli ka sɔrɔ mɔgɔ yan i n’a fɔ ja in bɛ a jira cogo min.

Ja

Aw bɛ se ka a lajɛ ni aw bolokɔni ye nin cogo la.

Ja

A bɛ bonya ni aw bɛ sɔgɔsɔgɔ walima ni aw bɛ fɛn giriman ta.

A gɛnɛgɛnɛ bɛ bɔ yan i n’a fɔ ja in bɛ a jira cogomin,

Ja

ani a tɛ bonya ni aw bɛ sɔgɔsɔgɔ.

Ni a bɔra dimimadalanw na, fura fosi tɛ ɛrini na. Ni a ka jugu kosɛbɛ aw bɛ se ka gɛni don walima ka a opere.

Mɔgɔ bɛ a yɛrɛ tanga ɛrini ma cogo min:

Ni aw bɛ fɛn girimanw kɔrɔta, aw bɛ nin ja ladege ka aw sonsoro ka sɔrɔ ka aw senw faraɲɔgɔn kan:

Ja

aw kana a kɛ tan:

Ja

Mɔgɔ bɛ se ka balo ni ɛrini ye cogomin:

Aw kana fɛn girimanw kɔrɔta.

Aw bɛ a siri ka a gɛrɛntɛ.

Aw ye a lajɛ ka a siri

Aw bɛ fini mugu dɔ da ɛrini yɔrɔ kan sɛntiri kɔrɔ

Ja

Walasa o ka a gɛrɛntɛ

Aw ye aw hakili to a la: ni ɛrini bɔra ko aw tɛ se ka a lasegin a nɔ na, aw bɛ banabagatɔ ladaka a yɔrɔ digidigi dɔɔni, aw bɛ taa a lajɛ joona dɔgɔtɔrɔso la.

Ni banabagatɔ bɛ fɔɔnɔ ni a tɛka banakɔtaa sɔrɔ, a ka jugu kosɛbɛ aw bɛ taa joona dɔgɔtɔrɔso la. A bɛ se kɛ a tigi ka kan ka opere. Sani o cɛ, aw bɛ a furakɛ i n’a fɔ bɛlɛnin (sɛbɛn ɲɛ Bɛlɛni ni kɔnɔnafɛnw foroko cili (farali) lajɛ).

📖 Gafe kɔnɔkow
← Segin kɔfɛ | Taa ɲɛfɛ →