Sigida 15 Wololabanaw

Funubana ni kɛn cayali mɔgɔ fari la

Funubana ye bana ye min ka jugu kosɛbɛ, a taamasiɲɛ ye kurukuru finman ye, kurukuru minnu bɛ funu, u nɔ bɛ bɔ wa u ka teli ka farikolo fan tɔ lasɔrɔ joona kɛrɛn­kɛrɛnnenya la, ɲɛda. A ka ca a la gɛnɛgɛnɛ, farigan ani nɛnɛ bɛ kɛ a senkɔrɔ.

Kɛn cayali fana ye bana juguba ye, farikololabana don min bɛ se ka fari fan bɛɛ lasɔrɔ. A ka ca a la, a bɛ sɔrɔ fari tigɛli fɛ. A joli ka jugu wa a kɛrɛdaw lafinnen don ka tɛmɛ funubana taw kan.

A furakɛcogo

Funubana ni kɛncayabana bɛɛ furakɛli ka kan ka daminɛ joona. Aw bɛ banakisɛfagalan ta: penisilini furakisɛ hakɛ 400.000 ta siɲɛ 4 tile kɔnɔ, ni a ka jugu kosɛbɛ, aw bɛ a pikiri hakɛ 800.000 kɛ tile o tile (aw ye sɛbɛn ɲɛ Porokayini, la procaïne lajɛ). Aw bɛ tɛmɛ ni banakisɛfagalan tali ye fo tile 2 bana bannen kɔfɛ. Aw bɛ bandi nɔrɔ a la ani ka asipirini ta walasa ka a dimi mada.

📖 Gafe kɔnɔkow
← Segin kɔfɛ | Taa ɲɛfɛ →