Cɛ ni muso minnu tɛ se ka bange kɛ (konaya)

Tuma dɔw la cɛ ni muso dɔw bɛ a ɲini ka den sɔrɔ, nka muso tɛ se ka kɔnɔta. O bɛ a sɔrɔ u fila dɔla kelen ye kona ye. Tuma dɔw la, fura fosi tɛ a tigi ka den sɔrɔ la, nka tuma dɔw la fura bɛ a dɔw la barisa a bɛɛ bɛ bɔ konaya in sɔrɔcogo la.

Fɛn minnu ka teli ka kɛ konaya kunw ye

Konaya. A tigilamɔgɔ dancogo de bɛ a kɛ ni a tɛ se ka den sɔrɔ abada. Cɛ ni muso dɔw bɛ bange ni konaya ye.
Fanga dɔgɔya ni balo ɲuman ntanya. Jolidɛsɛ jugugumanba bɛ a kɛ muso dɔw la, dumuni nafama dunbaliya ni iyodi (iode) ntanya bɛ se ka muso bali ka kɔnɔta. A bɛ se ka kɔnɔ tiɲɛ fana sani a ka yɛlɛma ka kɛ den ye (kɔnɔjilama). Tuma dɔw la kɔnɔ yɛrɛ bɛ tiɲɛ ka a sɔrɔ muso tɛ a dɔn ko a kɔnɔma don (aw ye kɔnɔtiɲɛ lajɛ sɛbɛn ɲɛ Kɔnɔtiɲɛni a yɛrɛma na).
Muso min tɛ se ka kɔnɔta, walima min kɔnɔ caman tiɲɛna, o ka kan ka dumuni nafamaw ni kɔkɔ wasa dun. Ni jolidɛsɛ jugumanba fana bɛ a la, a ka joliseginfurakisɛ ta (sɛbɛn ɲɛ Nɛgɛ, le fer). O bɛ se ka a dɛmɛ ka kɔnɔta ani ka den kɛnɛman bange.
Musoyalabana basigilen, tɔkɔkolodimi min bɛ sɔrɔ sopisi walima damajalan fɛ, o ye muso ka konaya sababu caman ye. Furakɛli bɛ se ka a tigi kɛnɛya ni o ye a sɔrɔ bana ma juguya ka a damatɛmɛ. Sopisi ni damajalan kunbɛnni ni u furakɛli a tuma na, o bɛ caman bɔ muso konaw hakɛ la.
Cɛ dɔw fana tɛ se ka kɔnɔ da u musow la barisa u lawaji man ca. O la a ka fisa cɛ ma, a ka a muɲu tile damadɔ ka a sɔrɔ a ma se a muso ma. Sani a ka kɔnɔta waati cɛ kalo o kalo, waati min bɛ kɛ a ka koli labanw ni koli nataw ni ɲɔgɔn cɛ (aw ye o kɛcogo lajɛ sɛbɛn ɲɛ Donw jateli fɛɛrɛ la). O cogo la cɛ bɛ lawaji caman mara ka bɛn ni a muso ka kɔnɔta waati ye.

Aw ye aw janto nin na: Aw bɛ fankisɛ ni fura wɛrɛw minnu di cɛ ni musow ma tuma dɔw la minnu tɛ se ka den sɔrɔ, olu tɛ mako ɲɛ fo ni o ye a sɔrɔ u ka densɔrɔbaliya kun ye fankisɛ dɔgɔya walima a ntanya ye. Dɔgɔtɔrɔ dɔrɔn de bɛ se ka o dɔn denko sɛgɛsɛgɛli ɲɛnɛmaw kɔfɛ. O la aw bɛ taa dɔgɔtɔrɔ ka aw lajɛ, ka da a kan farafinfura tɛ fosi ɲɛ a la. Aw kana aw ka wari tiɲɛ fɛn nafantanw na.

Ni aw kɛra muso ye min tɛ se ka den sɔrɔ, aw ka a dɔn ko fɛn caman bɛ yen min bɛ se ka aw lanisɔndiya aw ka ɲɛnɛmaya kɔnɔ;

Lala aw bɛ se ka den falatɔ dɔ ta denmarayɔrɔw la ka o kɛ aw ta ye. Furuɲɔgɔn caman bɛ yen olu ye denw ta denmarayɔrɔw la wa u kɛra u fɛ i n’a fɔ u yɛrɛ wolodenw.
Lala aw bɛna kɛ kɛnɛyabaarakɛla ye walima aw bɛna aw ka sigidamɔgɔw dɛmɛ baara wɛrɛ la. Aw tun bɛna kanu min ɲɛsin aw denw ma aw bɛ se ka o ɲɛsin mɔgɔ wɛrɛw ma o nafa kabon aw bɛɛ ma.
Ni aw bɛ dugumisɛnni kɔnɔ min mɔgɔw tɛ muso densɔrɔbali fɛ, lala mɔgɔ tɔw ni aw yɛrɛ bɛ se ka kɛ jɛkulu kelen ye walasa ka dɛmɛ don mɔgɔw ma minnu mako bɛ a la, ani ka a jira u la ko muso ka nisɔndiyako dan tɛ denwolo ye.

📖 Gafe kɔnɔkow
← Segin kɔfɛ | Taa ɲɛfɛ →