Muso ka kansɛribana

Kuru misɛn bɛ muso caman sin kɔnɔ. O kuru bonya n’a cogoya bɛ yɛlɛma, a bɛ magaya fana muso ka kalolabɔ waati. Tuma dɔw la, n’o kuru ma ci, a bɛ se ka kɛ sinna kansɛri taamasiɲɛ ye. Kansɛri furakɛcogo ɲuman bɛ bɔ a taamasiɲɛ fɔlɔw dɔnni n’a furakɛli la joona. A ka c’a la, opereli de y’a fura ye.

Sinna kansɛri taamasiɲɛw

• Muso kɛtɔ k’a sinbara dogidogi, a bɛ se ka kuru fitini dɔ kɔlɔsi a sinbara kɔnɔ, o kuru bɛ bonya dɔɔni dɔɔni (aw bɛ ja in lajɛ).
• Walima dingɛ fitiniw ni wowoniw bɛ se ka kɛ sin na, i n’a fɔ lenburuba fara bɛ cogo min na.
• Waati dɔw la, gɛnɛgɛnɛ minnu bɛ bɔ kama kɔrɔ, olu bɛ funu.
• Joginda fitini dɔ bɛ kɛ sinbara la walima sinbara yɔrɔ dɔ bɛ bilen min tɛ tunu.
• Ji salasala bɛ se ka bɔ sin na.
• A daminɛ na, dimi tɛ kɛ sin na wa a tɛ kalaya. Nka kɔfɛ, dimi bɛ wuli (Ni muso sin bɛ kalaya ani n’a b’a dimi, o bɛ se ka kɛ sindimi juguman taamasiɲɛ ye walima sinnabana wɛrɛ (sɛbɛn ɲɛ Sindimi juguman lajɛ).

Muso bɛ se k’a yɛrɛ sin lajɛ cogo min (k’a bana dɔn)

Muso bɛɛ ka kan k’a yɛrɛ sinbara lajɛcogo dɔn walasa ka jateminɛ kɛ kansɛri taamasiɲɛw b’a sin na. A ka kan k’a sin lajɛ siɲɛ kelen kalo o kalo a ka koli tɛmɛnen kɔfɛ ni tile tan ye.

• Muso ka kan ka sinw lajɛ dugare la, k’a jateminɛ kosɛbɛ ni kelen ka bon ni kelen ye. Aw b’a lajɛ ni nin taamasiɲɛ fɔlen ninnu dɔ bɛ sin na.
• Aw b’aw da aw kɔ kan kunkɔrɔdonnan dɔ kan walima dara kurulen dɔ. Aw bɛ sɔrɔ k’aw sinbara dogidogi ani k’a nukun mɔrɔmɔrɔ n’aw bolokɔniw ye. Aw b’a daminɛ sinnukun na ka taa aw kama kɔrɔ.
• Kɔfɛ, aw b’aw sinw bisi ka lajɛ ni joli walima nɛ bɛ bɔ u la.

N’aw ye kuru kɔlɔsi aw sinw kɔnɔ walima taamasiɲɛ wɛrɛ min cogo m’aw diya, aw bɛ taa a sɛgɛsɛgɛ dɔgɔtɔrɔso la. A dɔw la, nin kuru suguya ninnu bɛɛ tɛ kansɛri taamasiɲɛ ye nka a ka fisa k’u sidɔn joona.

Kɔnɔbarala kansɛri taamasiɲɛw

Kuru caman sababu ye den bonya cogo ye kɔnɔbara la. Kuru minnu bɛ bana kofɔ, olu sababu bɛ se ka kɛ fɛn caman ye, i n’a fɔ:

• Tuma dɔw la, kisi (banakisɛ dagayɔrɔ) walima jiforoko denso kɔnɔ.
• A bɛ se ka kɛ den dalen tɛ denso kɔnɔ.
• A bɛ se ka kɛ kansɛri ye.

Dimi bɛrɛ tɛ nin fɛn saba si daminɛ na nka a dimi bɛ juguya kɔfɛ. U bɛɛ ka kan ka furakɛ dɔgɔtɔrɔso la ani a ka c’a la, u caman bɛ laban opereli ma. N’aw ye kuru ye aw la dɔ bɛka fara min bonya kan dɔɔni dɔɔni, aw bɛ taa dɔgɔtɔrɔso la.

Wolonugula kansɛri

Kansɛri bɛ se ka ye wolonugu la, denso walima yɔrɔ wɛrɛ. A ka teli ka musow sɔrɔ minnu si tɛmɛna san 40 kan.

A taamasiɲɛ fɔlɔ ye jolidɛsɛ walima koli banbali ye min ma sidɔn (min tɛ se ka ɲɛfɔ). O tɛmɛnen kɔ, aw bɛna bɔ kuru dɔ kalama kɔnɔbara la dimi bɛ min na.

Wolonugula kansɛri daminɛtɔ sɛgɛsɛgɛcogo kɛrɛn­kɛrɛnnen dɔ bɛ yen min bɛ wele ko Test de Papanicolaou. Ni nin sɛgɛsɛgɛli bɛ se ka kɛ aw ka sigida la, muso fɛn o fɛn si bɛ san mugan bɔ, olu bɛɛ ka kan k’a kɛ siɲɛ kelen san kɔnɔ. Fɛɛrɛ wɛrɛ bɛ yen min bɛ wele “ɲɛna lajɛli”. Aw bɛ winɛgiri kɛ wolonugu dawolo la; n’a ɲɛ yɛlɛmana ka kɛ jɛman ye, o bɛ se ka kansɛri kofɔ. Walasa ka dankaniya sɔrɔ ko kansɛri don, aw bɛ sɛgɛsɛgɛli wɛrɛ kɛ ka sɔrɔ k’a furakɛ.

N’aw sikanna dɔrɔn ko kansɛri b’aw la, aw bɛ wuli joona ka se dɔgɔtɔrɔso la. Farafinfuraw jɔyɔrɔ ka dɔgɔn kansɛri furakɛli la.

📖 Gafe kɔnɔkow
← Segin kɔfɛ | Taa ɲɛfɛ →