Sigida 21 Denmisɛnw Ladonni
I bɛ denmisɛn tɛgɛ ko sani a ka dumuni kɛ. A tɛgɛ bɛ ko ka caya tile kɔnɔ ten hali ni a tɛ na dumunikɛ. Kɔnɔboli, muraw, muragɛlɛn, ani bana suguya caman wɛrɛ bɛɛ bɛ den lasɔrɔ k’a sababu kɛ banakisɛ minnu bɛ na a tɛgɛ nɔgɔlen fɛ ye (barisa denmisɛn b’a tɛgɛ don a da kɔnɔ ka caya!).
Tɛgɛko bɛ banakisɛ banbaliw bali ka to tɛgɛ la, o b’a to o banakisɛw tɛ don da kɔnɔ ka bana bila yen. Tɛgɛko matarafali bɛ denmisɛn to a ka kɛnɛya la.
I bɛ denmisɛnw ko don o don. I b’u sɔninfaraw tigɛ walasa nɔgɔ kana don u jukɔrɔ. I bɛ finiw ni dalanw ko tuma bɛɛ. Denmisɛnw ni balikuw bɛɛ dama ka kan banakɔtaayɔrɔ ladonnen ni a saniyalen na tuma bɛɛ. N’a ma kɛ ten, bo n’a kɔnɔbanakisɛw, olu minnu ye banaw sun ye, o bɛ yɛrɛkɛ fan bɛɛ fɛ. N’i sera ka ɲɛgɛnw jɔ i ka du ye, i sigiɲɔgɔnw ka se ka dɔ fana jɔ u yɛrɛ ye sigida la, o bɛ kɛ aw ka kɔnɔboli kunbɛnnen ye aw fɛ.
Ji ni Jinɔgɔlabɔ: dakun don Sigida 12, Kɛnɛya sabatili furaw fɔlen don min kɔnɔ. Kumakan caman fɛsɛfɛsɛlen don a kɔnɔ minnu ye hakilinajiraw ye jinɔgɔlabɔ sankɔrɔtali kan ani kɔnɔboli kunbɛnni kan denmisɛnw na.