Furaminɛn maracogo
- Aw bɛ fura bɛɛ mara yɔrɔ la, denmisɛnniw tɛ u lasɔrɔyɔrɔ min, ka da a kan, u bɛ se ka fura dɔ ta ka min bɛ se ka u bana.
- Aw bɛ furaw tacogo sɛbɛn fura forokow bɛɛ kan ka ɲɛ.
- Aw bɛ furaminɛn bila yɔrɔ la, yɔrɔ min sumanen don ni a ɲiginnen tɛ ani ni a jɛlen don; a man kan ka bila yɔrɔ la ɲɛbɛrɛw ni ɲinɛw bɛ a la sɔrɔyɔrɔ min na. Aw bɛ minɛmisɛnniw ni bandi, kɔrimugu mara manaforogo datugulen kɔnɔ.
- Furaminɛn falen ka kan ka to fura la tuma bɛɛ; aw mana fura o fura ta, aw bɛ aw teliya ka o nɔnabila.
- Aw bɛ aw hakili to furaw la, u kana kɔrɔ u marayɔrɔ la. Ni min kɔrɔla walima ni a tawaati tɛmɛna, aw bɛ o fili, ka sɔrɔ ka a nɔnabila ɲini min dilannen kura don.
Aw ye aw hakili to nin na: fura dɔw bɛ yen, i n’a fɔ tetarasikilini (tétracyclines), ni olu tawaati tɛmɛna, o farati ka bon kosɛbɛ. Ka a sɔrɔ penisilini (pénicillines) furakisɛlama walima a mugulama min bɛ labɛn ka kɛ siroji ni pikiriji ye, o bɛ se ka kɛ ka mako ɲɛ san kelen a tawaati tɛmɛnen kɔ, ni o ye a sɔrɔ a maralen tun don yɔrɔ sumanen jalen na. Nka penisilini mana kɔrɔ, a fanga bɛ dɔgɔya, o la ni aw bɛ furakɛli kɛ ni a ye, aw bɛ dɔ fara a tata hakɛ kan.
Aw ye aw hakili to nin na: penisilini bɛ ta nin tacogo la basi tɛ o la, nka a farati ka bon tuma dɔw la ka dɔ fara fura tɔw tata kofɔlen hakɛ kan.
📖 Gafe kɔnɔkow
← Segin kɔfɛ | Taa ɲɛfɛ →