Sidabana furakɛcogo
Tubabufura fara farafinfura kan, fura ma se ka sɔrɔ min bɛ sida furakɛ fɔlɔ. Nka fura wɛrɛw bɛ se ka di sidatɔw ma walasa u fari ka se ka bana tɔw kɛlɛ. O fura ninnu bɛ wele ko anti eretorowiro (antirétroviraux), wa o fura ninnu bɛ kɛ sababu ye sidatɔ kɛnɛman ka to ani ka mɛn si la ka bana to a la (aw ye gafe ɲɛ Sidabanafura lajɛ).
Bana wɛrɛw bɛ sidabanakisɛtɔw sɛgɛn, o de kama u caman bɛ kotirimɔkizazɔli (cotrimoxazole) ta don o don walasa ka o banaw kunbɛn (aw ye gafe ɲɛ Kotiri, Cotrimoxazole lajɛ). Aw bɛ aw jija ka bana bɛɛ furakɛ:
- Ni kɔnɔboli don, aw bɛ kɛnɛyaji min (aw ye gafe ɲɛ Kɛnɛyaji lajɛ).
- Ni safa don, aw bɛ wiyolɛ d zantiyani (violet de gentiane), nisitatini (nystatine) walima mikonazɔli (miconazole) ta (aw ye gafe ɲɛ Nɔ walima tomi jɛmanw dakɔnɔna na ni Nisitatini, Nystatine lajɛ).
- Ni kurukuruw don, aw bɛ asidi tirikuloro-asetiki (acide trichloroacétique) walima podofilini (podophylline) ta (aw ye gafe ɲɛ Asidi tirikuloro-asetiki, acide trichloroacétique ni Podofilini, Podophylline lajɛ).
- Ni farigan don, aw bɛ ji caman min, ka asipirini (aspirine) walima asetaminofɛni (acétaminophène) ta ani ka fini su ji la ka o da aw fari kan walasa ka fari suman (aw ye gafe ɲɛ Farigan lajɛ).
- Ni sɔgɔsɔgɔ don, aw bɛ ji caman min wa ni disidimi don, aw bɛ banakisɛfagalan ta (aw ye gafe ɲɛ Sɔgɔsɔgɔ lajɛ).
- Ni sɔgɔsɔgɔ walima farigan tɛmɛna dɔgɔkun kelen kan, aw bɛ taa dɔgɔtɔrɔso la walasa ka ladilikanw sɔrɔ ani ka sɔgɔsɔgɔninjɛfura sɔrɔ barisa nin bana ninnu ka teli ka sidatɔ minɛ (aw ye gafe ɲɛ Sɔgɔsɔgɔnijɛ lajɛ).
- Ni ŋɛɲɛ walima kurukuru don, aw bɛ ŋɛɲɛfuraw ta (antihistaminiques, sɛbɛn ɲɛ Faritanabanaw ni fɔɔnɔ: fariŋɛɲɛfuraw) ani ka banamisɛnw furakɛ (sɛbɛn ɲɛ Fari bilenni ni fariŋɛɲɛw (Faritanabanaw) lajɛ).
- Aw bɛ joli bɛɛ furakɛ (aw ye gafe ɲɛ Jolijuguman furakɛcogo lajɛ).
- Fari kalankalan don, aw bɛ gafe ɲɛ Kaba furakɛcogo lajɛ.
Aw ka kɛnɛya sabaticogo dɔ fana ye dumuni nafama dunni ye (aw ye sigida 11 lajɛ); ka dɔlɔ ni sigarɛti ni a ɲɔgɔnnaw dɔrɔgu bɛɛ ye ka u to yen; ka tila ka aw lafiɲɛ ani ka sunɔgɔ ka ɲɛ, o bɛɛ kɔ ka fugulan nafama don kafoɲɔgɔnyaw waatiw la.
Kun tɛ a la ka sidatɔw bila ka da u kelen na. U wolo walima u ninakilitɔ tɛ se ka sida lase mɔgɔ wɛrɛ ma. Nka farigan juguman, kɔnɔboli walima bana wɛrɛ bɛ mɔgɔ minnu na, olu ka kan ni furakɛli kɛrɛnkɛrɛnnen ye. A tigi somɔgɔw ni a teriw bɛ se ka a dɛmɛ ni hakilisigi kumaw ye, min bɛ a to u fari bɛ sidabana kun.
📖
Gafe kɔnɔkow
← Segin kɔfɛ |
Taa ɲɛfɛ →