Eritoromisini bɛ bana caman fana kɛlɛ i n’a fɔ penisilini kulu kɔnɔfuraw cogo, nka ale de da ka gɛlɛn dɔɔni. Diɲɛ fan caman na, eritoromisini ka ɲi galakanɔrɔ sugu dɔw furakɛli la ka tɛmɛ penisilini kan. A bɛ se ka kɛ ka tɔgɔtɔgɔni ni keteketeni fana furakɛ.
Mɔgɔ minnu fari tɛ sɔn penisilini la, eritoromisini ye o nɔnabilala ɲuman ye.
A bɛ se ka ta bana caman kama tetarasikilini fana nɔ na.
Eritoromisini bɛ na ni fɔɔnɔnege ni kɔnɔboli ye tuma dɔw la, kɛrɛnkɛrɛnnenya la denmisɛnw na. Aw kana a to a furakɛli ka tɛmɛ dɔgɔkun 2 kan barisa a bɛ se ka sayi nɛrɛmuguma lawuli.
Aw bɛ mg 30 ka se mg 50 tila sigiyɔrɔma 2 walima 4 ye, ka o di kilogaramu kelen o kilogaramu kelen na tile kɔnɔ. Aw bɛ a di tile 7 kɔnɔ ka se tile 10 ma walima fɔ k’a fɔ ko bana taamasiɲɛ bɛɛ banna ka lɛri 24 ɲɔgɔn ka tɛmɛ o kan.
Ni bana gɛlɛnw don, aw bɛ hakɛ kofɔlen ninnu ɲɔgɔn 2 di.