A jilama bɛ sɔrɔ ani podofilini ni bɛnzuyɛn ɲagaminen 10% ka se 25% ma.
Ale bɛ mu dogoyɔrɔlakuruw la walasa ka dɔ bɔ u bonya la. Podofilini ŋɛɲɛka bon wolo kɛnɛman ma, o la aw bɛ aw janto aw yɛrɛ la a mutɔla. Sani aw ka a mu, a ka fisa ka tulu (wazelini) mu kuru laminiw na walima tulu suguya wɛrɛ walasa ka u tanga. A munen kɔ aw bɛ a to a ka ja pewu. (nin kuma nafa ka bon cɛw ma minnu cɛya forokoni bɛ maga kuru la). lɛri 4 kɔfɛ ka se lɛri 6 ma, aw bɛ a yɔrɔ ko ka ɲɛ. Aw bɛ se ka segin furakɛli kan dɔgɔkun 1 kɔfɛ. A ka ca a la furakɛli bɛ to sen na fo dɔgɔkun caman.
Aw ye aw janto nin na: ni a bɛ aw fari ŋɛɲɛ kojugu, aw kana a mu. Ni kuruw bɛka joli bɔ, aw kana podofilini mu u la. Musokɔnɔmaw ni denbatigw man ka ka podofilini mu.
Ale jilama bɛ sɔrɔ.
Ni podofilini, podophyllin ma sɔrɔ, aw bɛ se ka furakɛli kɛ ni asidi tirikuloro-asetiki ye. Ale fana ka teli ka fari tiɲɛ, o la aw bɛ aw janto aw yɛrɛ la a mutɔla. Aw bɛ fɔlɔ ka wazelini walima munitulu wɛrɛ mu kuruw lamini na. Aw bɛ wolosuw bɔ kuruw la ni hakilisigi ye. Aw bɛ kalani dɔ su fura in na ka o da kuru ninnu la dɔɔni dɔɔni. A ka ca a la furakɛli bɛ mɛn senna wa a ka kan ka kɛ dɔgɔkun o dɔgɔkun.
Aw ye aw janto nin na: nin sɛgɛ in bɛ se ka mɔgɔ jeni kosɛbɛ. Aw bɛ aw bolo ni aw fari fan tɔw lakana ka u tanga a ma, ni a sera aw fari fan min ma, aw bɛ o yɔrɔ ko joona.