Sɔgɔsɔgɔ ye farikolo ka fɛɛrɛ ye fiɲɛsiraw Saniyali kama min bɛ taa fo fogonfogon la, a bɛ banakisɛ ni nɔgɔw bali ka don fogonfogon la. Sɔgɔsɔgɔ fana ye farikolo kɛlɛkɛcɛ dɔ fana ye, o de kama sɔgɔsɔgɔfura bɛ tɔɔrɔ min lase mɔgɔ ma, a tɛ o mako ɲɛ. Sɔgɔsɔgɔfura ninnu ka kan ka ta kankɔnɔŋɛɲɛ dɔrɔn de kama ani sɔgɔsɔgɔjalan min bɛ mɔgɔ bali ka sunɔgɔ. Fura wɛrɛw bɛ yen, olu dabɔra kari magayali kama ka sɔrɔ ka a labɔ.
Tiɲɛ na siro suguya fila ninnu bɛɛ (minnu bɛ sɔgɔsɔgɔ mada ani minnu bɛ kari labɔli nɔgɔya) bɛ ta siɲɛ caman ka a sɔrɔ u ɲɛci tɛ yen. Sɔgɔsɔgɔfura lakodɔnnenw caman bɛ yen olu tɛ mako ɲɛ ni wari latiɲɛ tɛ.
Sɔgɔsɔgɔfura ɲɛnɛma ni a laɲuman tɛ tɛmɛ ji kan. Ka ji caman min ani ka i wusu jikalan na, o funteni bɛ kari bɔli nɔgɔya, o bɛ sɔgɔsɔgɔ nɔgɔya ka tɛmɛ furaw kan. Walasa ka a kɛcogo dɔn, aw bɛ gafe ɲɛ Sɔgɔsɔgɔ furakɛcogo lajɛ. Farafin sɔgɔsɔgɔfura dilancogo ɲɛfɔlen don gafe ɲɛ Sɔgɔsɔgɔ furakɛcogo la.
A sirojilama bɛ sɔrɔ.
A furakisɛlama fana bɛ yen miligaramu 30 walima 60. Asipirini walima asetaminofɛni bɛ a la tuma dɔw la, nka tuma dɔw olu tɛ a la.
Kodeyini ye dimimadalan ɲumanba ye min fanga ka bon ni sɔgɔsɔgɔfura caman ye, mɔgɔw ye a tali kɛ u delinanko ye, o de ye a to a sɔrɔli ka gɛlɛn.
A ni sɔgɔsɔgɔfura wɛrɛw sirojilama ɲaminen bɛ sɔrɔ walima a furakisɛlama. Walasa ka a tacogo dɔn, aw bɛ furukansɛbɛn lajɛ. A dɔɔni bɛ mako ɲɛ sɔgɔsɔgɔ madali la ka tɛmɛ dimi kan.
Walasa ka baliku ka sɔgɔsɔgɔfurakɛ, a ka ca a la, miligaramu 7 ka se miligaramu 15 ma o bɛ wasakɛ.
Denmisɛnniw ta man kan ka se o hakɛ ma, aw bɛ u ka furadita bɛrɛ bɛn u si ni u girinya ma (aw ye gafe ɲɛ Ni fura wɛrɛ tɛ i bolo balikuw dɔrɔn ka tata kɔ, i bɛ o suma cogo di ka o bɛn den ka tata hakɛ ma? lajɛ)
Dimigɛlɛn na, mɔgɔkɔrɔba bɛ se ka kodeyini miligaramu 30 ta ka se 60 ma lɛri 4 o lɛri 4.
Aw ye aw janto nin na: kodeyini ye delinafura ye. Aw bɛ a ta tile damadɔ dɔrɔn kɔnɔ.