Kababilen ni ɲɛnakaba furaw

Asikulowiri, Acyclovir

Izinitigiw ka tɔgɔ dalen: zowirakisi, Zovirax.

A furakisɛ miligaramu 200 ni miligaramu 400 walima a miligaramu 800 bɛ sɔrɔ.

Asikulowiri bɛ banakisɛw faga wa a bɛ kɛ ka kababilen ni ɲɛnakabaw furakɛ. Asikulowiri tɛ kababilen furakɛ nka a bɛ a dimi nɔgɔya ani ka a to bana tɛ jɛnsɛn fari la. Aw bɛ fura in ta ni ji caman ye. Komokilidimitɔ man kan ka fura in ta.

A kɔlɔlɔw:

Asikulowiri bɛ gɛlɛya dɔw lase mɔgɔ ma i n’a fɔ kungolodimi, ɲɛnamini, fɔɔnɔnege, ani fɔɔnɔ. A bɛ hakilibɔ bila mɔgɔ la ani ni a ye sugunɛ sɔrɔbaliya bila mɔgɔ la, o bɛ a jira ko tata hakɛ cayara.

Asikulowiri tata hakɛ:

Ni dogoyɔrɔlakaba don walima kurumisɛnniw:

• Ni bana in siɲɛ fɔlɔ don ka aw minɛ, aw bɛ asikulowiri miligaramu 200 ta, siɲɛ 5 don o don fo tile 7, walima aw bɛ a miligaramu 400 ta siɲɛ 3 don o don fo tile 7.
• Nka ni bana tun delila ka aw minɛ ka ye, ni aw sɔmina a taamasiɲɛ fɔlɔw la dɔrɔn, aw bɛ fura in ta fo tile 5, taamasiɲɛw i n’a fɔ a yɔrɔw bɛ mɔgɔ sɔgɔsɔgɔ, ka a jenijeni, walima ka kurukuruw bɔ a la.
• Ni bana in ye aw minɛ siɲɛ 6 san kɔnɔ, aw bɛ asikulowiri miligaramu 400 ta siɲɛ 2 don o don fo san 1. O kɔ aw bɛ fura jɔ ka a lajɛ ni a ɲɛci bɛ yen halibi.

Ni ɲɛnakaba don:

Aw bɛ asikulowiri miligaramu 600 ta ka se a miligaramu 800 ma siɲɛ 5 don o don tile 7 fo ka se tile 10 ma.

📖 Gafe kɔnɔkow
← Segin kɔfɛ | Taa ɲɛfɛ →