Lidokɛni ye kirinna ye min pikiri bɛ kɛ joginda lamini na ka a kirin walasa a kana digi mɔgɔ la. A nafa ka bon funuda nɛ bɔli ni joginda kalali la. Ni aw bɛ a fɛ ka koko jugumanba jolikuru labɔ, aw ka kan ka lidokɛni pikiri kɛ o yɔrɔ la fɔlɔ.
Farikoloyɔrɔ min ka kan ka tigɛ walima ka kala, aw bɛ lidokɛni pikiri kɛ o yɔrɔ lamini wolo kɔrɔ, o yɔrɔ ni joginda cɛ ka kan ka kɛ santimɛtiri kelen (1 cm) ye. Aw bɛ fɔlɔ ka a yɔrɔ saniya ka sɔrɔ ka lidokɛni pikiri kɛ. Santimɛtiri 2 o santimɛtiri 2, aw bɛ kirinnan pikiri mililitiri 1 ɲɔgɔn kɛ o yɔrɔ wolo kɔrɔ. (Aw kana tɛmɛ a mililitiri 20 kan.)
Ni joli saniyalen don, aw bɛ se ka pikiri kɛ a kɛrɛdawolow la fana. Ni joli nɔgɔlen don, aw bɛ pikiri kɛ jloi wolo kɔrɔ (a saniyalen kɔ) ka lamini ani ka saniya ka ɲɛ sani aw ka a datugu a nɔna.
Sani aw ka joli kala, aw bɛ lidokɛni ni epinefirini pikiri kɛ a la. Epinefirini b’a to kirina ka mɛn ani ka jolibɔn kunbɛn. Aw kana Epinefirini pikiri kɛ sudukunnabanabagatɔw la.
Musoya yɔrɔ kalata min sɔrɔla jiginni senfɛ, ani bolokɔni ni senkɔni ni cɛya ni tulon ani nu kalataw la, aw bɛ lidokɛni dɔrɔn pikiri kɛ. Nin nafa ka bon barisa Epinefirini bɛ se ka sababu ye joli bolili bali ka tɛmɛ nin yɔrɔw la min bɛ dimi juguya.
Nuci jugumanw bɛ furakɛ ni lidokɛni ni epinefirini ɲagaminen ye. Aw bɛ kɔɔrimugu su furaji la ka nu don nu na. Epinefirini bɛ kɛ sababu ye jolisiraw datugu min bɛ joli bali ka bɔn.