Faritanabanaw ni fɔɔnɔ: fariŋɛɲɛfuraw

Fariŋɛɲɛfuraw ye fura ye minnu bɛ baarakɛ farikolo la cogoya caman na:

U bɛ farikolo dɛmɛ ka faritanabanaw mada walima ka u kunbɛn, ŋɛɲɛ walima kurukuru wolo la, fɛnɲɛnamani kinda, jirifeere ni binjalan gɔngɔn mura ani faritanabana jugumanba
U bɛ faritanabana walima fɔɔnɔ kunbɛn ani ka u nɔgɔya.
U bɛ sunɔgɔ bila mɔgɔ la. Ni aw bɛ fura ninnu ta, aw kana faratila baara kɛ i n’a fɔ: masinina baaraw walima dɔlɔmin.

Porometazini (prométhazine) ni difenidaramini, diphénhydramine (Benadirili), olu ye fariŋɛɲɛfuraw farinmanw ye minnu bɛ sunɔgɔ bila mɔgɔ la kojugu. Dimɛnidaranati diménhydrinate (Dramamine) ni difenidaramini bɔlen don, u bɛ kɛ ka faritanabanaw furakɛ. O la fɔɔnɔ min sababu kɛra fɛn wɛrɛw ye, porometazini bɛ o lajɔ.

Kulɔrifeniramini, chlorphéniramine da ka nɔgɔ ni fariŋɛɲɛfura tɔw ye wa a tɛ sunɔgɔ bila mɔgɔ la kosɛbɛ. O de kama a ka fisa tuma dɔw la ka kulɔrifeniramini ta fariŋɛɲɛ na tilefɛ. Porometazini tali ka ɲi sufɛ barisa a bɛ sunɔgɔ bila mɔgɔ ani ka ŋɛɲɛ tigɛ.

Foyi tɛ a jira ko fariŋɛɲɛfuraw bɛ mura nɔgɔya. Aw bɛ u kɛ ka mura furakɛ tuma dɔw la ka a sɔrɔ u ɲɛci tɛ o la. U man kan ka ta ka caya.

Fariŋɛɲɛfuraw man kan ka ta sisan na, barisa u bɛ kari fasaya ka ninakili tɔ gɛlɛya.

Fariŋɛɲɛfuraw pake kelen ka kan ka bila furaminɛn kɔnɔ. Porometazini de ka ɲi aw bolokɔrɔ.

Ka da a kan ale tɛ sɔrɔ tuma bɛɛ, o la fariŋɛɲɛfuraw wɛrɛw bɛ se ka di.

Fura tali sariya la, fariŋɛɲɛfuraw dunta de ka fisa. A pikiri ka ɲi fɔɔnɔ jugumanba de lajɔli la walima sani aw ka bagakɛlɛfuraw di (sa ka kinni) ani tɔɔrɔ wɛrɛw minnu bɛ aw kɔnɔnafili. Ni denmisɛnni don, a ka fisa aw ka a kɛ a banakɔtaayɔrɔ fɛ.

Porometazini, Prométhazine

Izinitigiw ka tɔgɔ dalen: Fenɛrigan, Phenergan.

a tuma dɔw la

A furakisɛlama miligaramu 12.5 bɛ sɔrɔ
Pikiri anpululama miligaramu 25, mililitiri 1 na
A miligaramu 12.5, miligaramu 25, ani miligaramu 50 min bɛ don banakɔtaayɔrɔ fɛ

Aw ye aw janto nin na: aw kana porometazini di denmisɛnniw ma minnu ma san 2 sɔrɔ. Musolasiritɔw ni denbatigiw olu bɛ se ka a ta dɔrɔn, waati min ni a tali bɛ kɛ u ma waajibi ye.

Porometazini tata hakɛ (miligaramu 1/kilogaramu/tile)

Ni aw bɛ a furakisɛ miligaramu 12.5 ta siɲɛ 2 tile kɔnɔ

A diko kelen o kelen:

Baliku: miligaramu 25 ka se 50 ma (furakisɛ 2 ka se 4 ma)
Denmisɛnni san 7 ka se 12 ma: miligaramu 12.5 ka se 25 ma (furakisɛ 1 ka se 2 ma)
Denmisɛnni san 2 ka se 6 ma: miligaramu 6 ka se 12 ma (furakisɛ ½ ka se 1 ma)
Den san 1: miligaramu 4 (furakisɛ ⅓)
Den min ma san 1 sɔrɔ: miligaramu 3 (furakisɛ ¼)

Ni aw bɛ pikiri kɛ fasasira fɛ, miligaramu 25 mililitiri la

Aw bɛ pikiri kɛ siɲɛ kelen, ani ka segin a kan lɛri 2 ka se lɛri 4 ma, ni a ɲɛci bɛ yen.

Aw bɛ pikiri kɛ siɲɛ 1:

Baliku: miligaramu 25 ka se 50 ma (mililitiri ½ ka se 2 ma)
Denmisɛnni san 7 ka se 12 ma: miligaramu 12.5 ka se 25 ma (mililitiri ½ ka se 1 ma)
Denmisɛnni min ma san 7 sɔrɔ: miligaramu 6 ka se 12 ma (mililitiri ¼ ka se ½ ma)
Den min ma san 1 sɔrɔ: miligaramu 2.5 (mililitiri 0.1)

Ni aw bɛ fura miligaramu 25 don banakɔtaayɔrɔ fɛ

Aw bɛ fura don banakɔtaayɔrɔ la ka ɲɛ ani ka segin a kan lɛri 4 ka se 6 ma ni a ɲɛci bɛ yen.

A don o don:

Baliku ni denmisɛnni min ka ca ni san 12 ye: miligaramu 25 (fura den 1)
Denmisɛnni san 7 ka se 12 ma: miligaramu 12.5 (fura ½)
Denmisɛnni san 2 ka se 6 ma: miligaramu 6 (fura ¼)

Difenidaramini, Diphénhydramine

Izinitigiw ka tɔgɔ Benadirili, Benadryl

Tuma dɔw la:

A forokonilama miligaramu 25 ni 50 bɛ sɔrɔ
Pikiriw: anpulu miligaramu 10 walima 50 mililitiri kelen kelen bɛɛ la

Aw ye aw janto nin na: aw kana difenidaramini di denyɛrɛni ma walima den bɛ muso minnu sin na. A ka fisa fana aw kana difenidaramini di musokɔnɔmaw ma, fo ni a kɛra waajibi ye.

Difenidaramini tacogo (miligaramu 5/kiligaramu/tile kɔnɔ)

Aw bɛ a forokoni miligaramu 25 ta

Aw bɛ a di siɲɛ 3 walima siɲɛ 4 tile kɔnɔ:

Baliku: miligaramu 25 ka se 50 ma (forokoni 1 walima 2)
Denmisɛnni san 8 ka se san 12 ma: miligaramu 25 (forokoni 1)
Denmisɛnni san 2 ka se san 7 ma: miligaramu 12.5 (forokoni ½)
Denyɛrɛni: miligaramu 6 (forokoni ¼)

Aw bɛ a pikiri kɛ sogobu la (mi), miligaramu 50 mililitiri kelen kelen bɛɛ la

Difenidaramini pikiri ka kan ka kɛ faritanabana jugumanba dɔrɔn de la. A pikiri bɛɛ ka kan ka kɛ siɲɛ kelen, ani ka segin a kan lɛri 2 ka se lɛri 4 ma ni a ɲɛci bɛ yen

Balikuw: miligaramu 25 ka se 50 ma (mililitiri 0.5 ka se 1 ma)
Denmisɛnni: miligaramu 10 ka se 25 ma, a bɛ bɔ fura bonya hakɛ la (mililitiri 0.2 ka se 0.5 ma)
Denw: miligaramu 5 (mililitiri 0.1)

Kulɔrifenamini walima kulɔrifeniramini (Chlorphénamine ou Chlorphéniramine)

Kulɔrifenamini ye fura ye min bɛ ŋɛɲɛ, tiso ani kurukuru nɔgɔya, ani ka fura ka kɔlɔlɔ bangelen wɛrɛw nɔgɔya. A bɛ se ka kɛ ka fɛnɲɛnamani kindaw furakɛ. Ni dumuni walima ni fura dɔ bɛ faritanabana bila mɔgɔ la walima binjalanmura (tisoli ni ɲɛŋɛɲɛ min bɛ sɔrɔ jirifeere gɔngɔn fɛ), fura in bɛ se ka ta olu fana kama.

Fura kɔlɔlɔw

Jigɔli (nka ale kɔlɔlɔw tɛ faritanabana fura tɔw ta bɔ).

A tata hakɛ

San 1 ka se san 2 ma: aw bɛ miligaramu 1 di siɲɛ 2 don o don fɔ k’a tigi ka nɔgɔya
San 3 ka se san 5 ma: aw bɛ miligaramu 1 di lɛri 4 o lɛri 4 ka se lɛri 6 ma fo a tigi ka nɔgɔya
San 6 ka se san 12 ma: aw bɛ miligaramu 2 di lɛri 4 o lɛri 4 ka se lɛri 6 ma fo a tigi ka nɔgɔya
San 12 ka yɛlɛn: aw bɛ miligaramu 4 di lɛri 4 o lɛri 4 ka se lɛri 6 ma fo a tigi ka nɔgɔya

Ni faritanabana jugumanw don: aw bɛ fɔlɔ ka epinefirini (épinéphrine) pikiri kɛ a tigi la (sɛbɛn ɲɛ Epinefirini, épinéphrine). Ni aw ye kulɔrifeniramini pikiri kɛ, o bɛ faritanabana in bali ka segin epinefirini fanga bannen kɔ. (Ni kulɔrifeniramini pikiri t’aw bolo, aw b’a furakisɛ d’a ma i n’a fɔ a ɲɛfɔlen don cogo min sanfɛ).

San 1 ka se san 5 ma: aw bɛ a miligaramu 2.5 pikiri kɛ a tigi la ka se miligaramu 5 lɛri 4 o lɛri 4 ka se lɛri 6 ma fo faritana taamasiɲɛ bɛɛ ka tunu.
San 6 ka se 12 ma: aw b’a miligaramu 5 pikiri kɛ tigi la ka se miligaramu 10 lɛri 4 o lɛri 4 ka se lɛri 6 o lɛri 6 ma fɔ k’a fɔ ko faritana taamasiɲɛ bɛɛ ka tunu.
San 12 san fɛ: aw b’a miligaramu 10 pikiri kɛ a tigi la ka se miligaramu 20 ma (nka aw kana tɛmɛ miligaramu 40 kan fiyewu lɛri 24 kɔnɔ) lɛri 4 o lɛri 4 ka se lɛri 6 ma fo faritana taamasiɲɛ bɛɛ ka tunu

Dimɛnidaranati, Diménhydrinate

Izinitigiw ka tɔgɔ dalen daramamini, Dramamine.

Tuma dɔw la,

a furakisɛlama miligaramu 50 bɛ sɔrɔ;
ani fana a sirolama miligaramu 12.5 min bɛ min ni kafeminkutu ye;
ka fara a furakisɛlama wɛrɛ kan min bɛ don banakɔtaayɔrɔ la

Nin bɛ feere faritanabanaw kama, nka u bɛ se ka ta i n’a fɔ fariŋɛɲɛfura tɔw ka faritanabanaw mada ani ka mɔgɔ lasunɔgɔ.

Dimɛnidaramini tacogo:

Aw bɛ a ta siɲɛ 4 tile kɔnɔ. A di o di:

Den sen 13 Sanfɛ ni baliku: miligaramu 50 ka se 100 ma (furakisɛ 1 walima 2)
Den san 7 ka se 12 ma: miligaramu 25 ka se 50 ma (furakisɛ ½ ka se 1 ma)
Den san 2 ka se 6 ma:miligaramu 12 ka 25 ma (furakisɛ ¼ ka se ½ ma)
Den minnu ma san 2 sɔrɔ: miligaramu 6 ka se 12 ma (furakisɛ ⅛ ka se ¼ ma)

📖 Gafe kɔnɔkow
← Segin kɔfɛ | Taa ɲɛfɛ →