Sigida 2 Bana minnu dɔn man di ka bɔ ɲɔgɔn na

Sigida 2
Bana minnu dɔn man di ka bɔ ɲɔgɔn na

Mun bɛ bana bila mɔgɔ la?

Mɔgɔ minnu tɛ bɔ jamana kelen na walima minnu ka laadaw tɛ kelen ye, olu tɛ banaw sɔrɔsababu ɲɛfɔ cogo kelen na.

Den ka kɔnɔboli sababu ye mun ye?

Mɔgɔ dɔw ka teli ka a fɔ ko den bangebaaw ye fɛn dɔ kɛ min man ɲi, walima ko olu ye laada dɔ tana tiɲɛ.

Dɔgɔtɔrɔ bɛ se ka a fɔ ko banakisɛ ye den ka bana sababu ye.

Forobakɛnɛya baarakɛla bɛ se ka a fɔ ko ji ɲuman ni ɲɛgɛn matarafabaliya de ye banaw sababu ye.

Sigida taabolo yɛlɛmali cakɛla bɛ se ka a fɔ ko denmisɛnniw ka kɔnɔboli banbali sababu ye dugukolo ni nafolo tilacogojuguya ye.

Karamɔgɔ bɛ se ka a ko sababu kɛ kalan matarafabaliya ye.

Mɔgɔw bɛ bana sababu dɔn ka dan u yɛrɛ ka dɔnta ni u ka miiriya hakɛ ma. O la, jɔn ta ye tiɲɛ ye bana sababuko la? A bɛ se ka kɛ tiɲɛ bɛ dɔw bolo walima tiɲɛ fan kelen. Barisa…

A ka c’a la bana sɔrɔli bɛ bɔ kun caman na.

Nin sababu minnu kofɔra san fɛ, olu kelen-kelen bɛɛ sen bɛ se ka kɛ den ka kɔnɔboli sɔrɔsababuw la.

Walasa ka bana kunbɛn ani ka a furakɛ ka ɲɛ, a ka fisa i ka i jija ka kunnafoni dafalen sɔrɔ banaw kan minnu sɔrɔli ka teli i ka sigida la ani u sɔrɔsababuw mumɛ kan.

Nin gafe in kɔnɔ, bana caman ɲɛfɔlen don ka minɛ kɛ bi ɲinini dalilumaw ma walima dɔnniya ka fura bɔlenw ma.

Walasa ka nin gafe in nafa sɔrɔ ka ɲɛ ani ka tacogo ɲuman sɔrɔ a kɔnɔfura laɲininenw kan, i mako bɛ jɔ banaw ni u sɔrɔsababuw faamuyako ɲuman na ni furakɛli dɔnniya sira batoli ye.Nin sigida in kalanni bɛ se ka i dɛmɛ.

📖 Gafe kɔnɔkow
← Segin kɔfɛ | Taa ɲɛfɛ →