Sigida 9
Labɛn ni ladilikan minnu ka kan ka matarafa pikiri kɛli kama

Pikiri ka kan ka kɛ kun jumɛn na, a man kan ka kɛ kun jumɛn na?

Pikiri kɛ kun man ca. Bana caman bɛ se ka kunbɛn ani ka u furakɛ ni fura duntaw ye. San o san mɔgɔ miliyɔn caman, kɛrɛn­kɛrɛnnenya la denmisɛnni kunda, olu bɛ bana, ka u kɛ fiɲɛtɔw ye, walima u bɛ fatu ka a sababu kɛ pikiriw ye, minnu man kan ka kɛ u la. O furakɛcogo jugu ninnu kɛlɛli nafa ka bon kɛnɛya la ka tɛmɛ bolici matarafali ni ji sanuman minni ani ɲɛgɛn matarafali kan. A ka ca a la:

Faratiba bɛ pikiri la ka tɛmɛ fura dunta kan.

Aw ye aw jija cogo bɛɛ la ka dɔgɔtɔrɔ dɔ ka dɛmɛ ɲini, barisa ni bana ka jugu kosɛbɛ fo ka a se pikiri kɛli ma, dɔgɔtɔrɔ dɔ ka kan ka o kɛ.

Pikiri ka kan ka kɛ kun minnu na, olu de filɛ:

1. Ni bana in fura pikirilama dɔrɔn de bɛ sɔrɔ.
2. Ni banabagatɔ bɛ fɔɔnɔ kojugu, walima ni a tɛ se ka foyi dun.
3. Bana cunnen kɛrɛn­kɛrɛnnen dɔw la, (aw ye gafe ɲɛ nata lajɛ).

📖 Gafe kɔnɔkow
← Segin kɔfɛ | Taa ɲɛfɛ →