Marafura ɲuman ye iwɛrimɛkitini ye. Nin fura in bɛ banakisɛ kɔkɔbaliw faga wa a ni fura wɛrɛ tɛ ɲɔgɔn kɛlɛ furakɛli senfɛ. Ni iwɛrimɛkitini tɛ yen, kɛnɛyabaarakɛla faamuyalen dɔ bɛ se ka diyetilikaribamazini (diéthylcarbamazine) di aw ma, o kɔ ka siramini (suramin) fara o kan.
Iwɛrimɛkitini nafa fana ka bon maɲa ni nugulatumuw furakɛli la.
Izinitigiw ka tɔgɔ dalɛnw: mɛkitizan, mectizan, sitoromɛkitali, stromectal.
A miligaramu 3 walima 6 kisɛ bɛ sɔrɔ.
Walasa ka a tata hakɛ dɔn, aw bɛ banabagatɔ pese walima aw bɛ hakɛw lajɛ, hakɛ ninnu ɲɛfɔlen don yan.
Aw ye aw janto nin na: aw kana iwɛrimɛkitini di den ma, den min girinya tɛ kilogaramu 15 bɔ (fɔcogo wɛrɛ la den min tɛ san 5 bɔ), ani musokɔnɔma, walima denbatigi walima kanjabanabagatɔ walima bana juguman wɛrɛ bɛ mɔgɔ min na. Tile damadɔ aw kana dɔlɔ min fura in talen kɔ.
A kisɛ miligaramu 6 la, kilogaramu o kilogaramu, aw bɛ a dunta mikɔrɔgaramu 150 di walima:
Ni mara don, a tata hakɛ cogoya wɛrɛ bɛ ɲɛfɔ ka ta kalo 6 la ka se san 1 ma.
A kisɛ miligaramu 6 la, kilogaramu o kilogaramu, aw bɛ mikɔrɔgaramu 200 di a tigi ma tako 1:
Ni maɲa don, aw bɛ segin nin tata hakɛ in kan tile 10 ni tile 14 cɛ tako 1 kɔfɛ.
Izinitigiw ka tɔgɔ dalɛnw: etarazan, Hetrazan, banosidi, Banocide.
A kisɛ miligaramu 50 walima 100 bɛ sɔrɔ
Diyetilikaribamazini bɛ tumumisɛnniw faga nka a tɛ se ka kɔkɔlenw faga. A fura in ka kan ta dɔgɔtɔrɔ dɔ ka bilasirali kɔnɔ. Musokɔnɔma man kan ka diyetilikaribamazini ta.
Walasa a kana aw ɲɛ tiɲɛ, aw bɛ a tali daminɛ hakɛ fitini na. A tacogo filɛ:
Aw bɛ tɛmɛ ni o miligaramu 1 tali ye kilogaramu o kilogaramu siɲɛ 3 don o don fo tile 13 ɲɔgɔn. (misali la, mɔgɔ min girinya ye kilogaramu 60 ye, aw bɛ miligaramu 30 di o ma tako 1 don fɔlɔ, don filanan miligaramu 60 tako 2 (miligaramu 30 tako kelen o kelen na), a don sabanan miligaramu 60 diko 3 tako 3 fana, wa tɛmɛ bɛ kɛ ni tile sabanan ka tata hakɛ ye don o don fo tile 14. Aw bɛ a ta dumuni kɔfɛ.
Diyetilikaribamazini bɛ faritanabana bila mɔgɔ la, min bɛ laban ka furakɛ ni faritanafuraw ye, walima kurukurufuraw, minnu bɛ di kɛnɛyabaarakɛla faamuyalen dɔ fɛ.
A tali kɔlɔlɔw: diyetilikaribamazini bɛ se ka gɛlɛya dɔw lase mɔgɔ ma i n’a fɔ kungolodimi, farikolosɛgɛn, fangadɔgɔya, dumunikɛbaliya, dumuniyɛlɛmabaliya, sɔgɔsɔgɔ, disidimi, farifabɛɛdimi walima kolotugundadimi, farikalaya ani ŋɛɲɛ.
Izinitigiw ka tɔgɔ dalen: nafiridi, Naphuride, zɛrimani, Germanin, bayɛri 205, Bayer 205, antiripoli, Antrypol.
A garamu 1 penisilinilama barani bɛ sɔrɔ.
A fura in ka ɲi ni diyetilikaribamazini, diéthylcarbamazine ye banakisɛ kɔkɔlenw fagali la, wa a pikiri ka kan ka kɛ diyetilikaribamazini talen kɔfɛ bana taamasiɲɛw bannen kɔ. Siramini bɛ fiɲɛ bila komokili la tuma dɔw la. Ni aw senw ye fununi daminɛ walima ni aw ye sugunɛkɛbana taamasiɲɛ dɔw ye aw la, aw bɛ siramini tali jɔ. Komokilibana bɛ mɔgɔ minnu na, o tigiw man kan ka siramini pikiri kɛ.
Siramini pikiri ka kan ka kɛ jolisira fɛ, a pikiri ɲɛdɔnbaga dɔ fɛ. Ni banabagatɔ ye baliku ye, aw bɛ siraminimugu garamu 1 kɛ mililitiri 10 pikiriji la, ka o kɛ dɔgɔkun o dɔgɔkun siɲɛ 1, ka a ta dɔgɔkun 5 fo dɔgɔkun 7. Aw bɛ a pikiri daminɛ ni hakɛ fitini ye, miligaramu 200 ɲɔgɔn. Aw bɛ faritanabanaw furakɛ.