Nin ɲɛdimi tuluniw bɛ se ka kɛ ka “ɲɛbilenni” furakɛ, ɲɛbilenni min sababu bɔra banakisɛw la, ani bɛ kɛ ka fiyenbana. Walisa ka fiyenbana furakɛ k’a ban pewu, aw bɛ tetarasikilini (gafe ɲɛ Tetarasikilini, tétracycline HCl, ɔkisitetarasikilini, oxytétracycline) walima eritoromisini (gafe ɲɛ Eritoromisini, Érythromycine) kisɛ ta. Ɲɛdimi tuluni bɛ se ka kɛ ɲɛ na fana walasa ka ɲɛw nɔgɔ kunbɛn ani ka ɲɛ joliw furakɛ (gafe ɲɛ Birintili walima joli ɲɛyeelendonda la).
Ɲɛdimi tuluni kɛcogo ɲuman de ye ka kan ka don ɲɛgolo kɔrɔ, a man kan ka kɛ a kan. Aw bɛ tuluni nin kɛ ɲɛ na siɲɛ 3 ka se siɲɛ 4 ma don o don.
Tetarasikilini (tétracycline) 1% walima eritoromisini (érythromycine) 0,5% fo a 1% tuluniw bɛ kɛ walasa ka joginda dɔw furakɛ bange kɔfɛ, walima ka a tanga ɲɛdimi misɛnni dɔw ma. Aw bɛ u di siɲɛ kelen lɛri 2 fɔlɔ kɔnɔ bangeli kɔfɛ.
Ni ɲɛdimi tuluniw tɛ aw bolokɔrɔ, aw bɛ se ka powidɔni iyode, povidone iodée tɔnita 2,5% walima nitarati darizan, nitrate d’argent tɔnita 1% kɛ ɲɛ kelen o kelen na. Nitarati darizan bɛ simi ni fiɲɛ ye a fili, o la aw kana ale kɔrɔlen kɛ ɲɛ na, barisa a bɛ den ɲɛ jeni. Ni sigana bɛ a la, aw kana nitarati darijan kɛ ɲɛ na cogosi la.
Ni aw bɛna tuluni kɛ ɲɛ na, aw bɛ ɲɛwaga dɔɔni ka tuluni kɛli daminɛɲɛ dingɛla ka taa kɛrɛ la. Ni tɔnita don, aw bɛ ɲɛ duguma wolo sama ka tɔniko fila kɛ a la. Aw ye aw janto, a bara kun kana se ɲɛ ma.
Aw ye aw kɔlɔsi: Aw kana nitarati darizan kɔrɔlen walima a dulenba kɛ aw ɲɛ na barisa a ta man di fiɲɛ fɛ u bɛ se ka denyɛrɛni ɲɛ jeni.