Anpisilini ni amɔkisisilini (Ampicilline et amoxicilline): banakisɛfagalan minnu bɛ banakisɛ caman faga

Anpisilini ni amɔkisisilini ye bɛɛ banakisɛcaman fagalanw ye, o kɔrɔ ye k’u bɛ banakisɛ sugu caman faga ka ka tɛmɛ penisilini kulu kɔnɔfura tɔw kan. U fila bɛ se ka falen ɲɔgɔn na. Ni aw ye anpisilini tali laɲini kɛlen ye yɔrɔ min na nin gafe kɔnɔ, aw bɛ se ka amɔkisisilini kɛ k’o nɔnabila n’a hakɛ kofɔlen ye.

Anpisilini ni amɔkisisilini ye fura ɲumanw ye, kɛrɛn­kɛrɛnnenya la u bɛ di denyɛrɛniw ni den fitiniw de ma. U fila nafa ka bon galakanɔrɔ ni tulodimiw bɛɛ furakɛli la. Anpisilini nafa fana ka bon kanjabana furakɛli la ani bana gɛlɛn suguya wɛrɛw minnu bɛ denkuraninw minɛ.

Kɔlɔlɔw

A fura ninnu fila bɛɛ bɛ fɔɔnɔnege ni kɔnɔboli bila mɔgɔ la nka kɛrɛn­kɛrɛnnenya la anpisilini de ta ka teli. Aw kana u di den kɔnɔbolitɔ ma ni aw b’a dɔn ko aw bɛ se k’a nɔnabila ni banakisɛ­fagalan wɛrɛ ye.

Kɔlɔlɔ lakodɔnnenba dɔ wɛrɛ ye kurukuru bɔli ye fari la. Kurukuru ŋɛɲɛma minnu bɛ to ka bɔ fari la ka tunun waati damadɔ kɔnɔ olu ka teli ka kɛ penisilini kɔlɔlɔw ye. Aw bɛ a dili jɔ o yɔrɔ bɛɛ ka tila ka penisilini sugu bɛɛ dili dabila pewu den ma. Ni kɔlɔlɔ wɛrɛw wulila a tigi fɛ tugun, o bɛ se ka juguya kojugu fo ka se a tigi saya ma. Faridegun dɔw la, eritoromisini, érythromycine bɛ se ka ta a nɔ na. Fura minnu maralen ka kan ka sɔrɔ denbaya ka furaminɛn kɔnɔ kalan. Kurukuru minnu bɛ i n’a fɔ ɲɔni kurukuru dɔgɔkun kelen fura tali daminɛnen kɔ, o bɛɛ tɛ faritanabana dɔ ye. Nka a ka gɛlɛn ka a dɔn ni o kurukuru faritanabana dɔ ye, o la a ka fisa ka fura tali jɔ.

Kunnafoni nafama

A fura ninnu bɛ ka dɛsɛ banaw kɔrɔ ka taa a fɛ. Aw ka sigida la, a bɛ se ka kɛ u tɛ na se ka fulukubanaw, tɔgɔtɔgɔni, walima bana wɛrɛw kɛlɛ bibi in na bilen.

Anpisilini ni amɔkisisilini tacogo

Anpisilini ni amɔkisisilini dunta bɛ baara kɛ ka ɲɛ. Anpisilini pikirilama fana bɛ se ka kɛ, nka o ka kan ka kɛ bana gɛlɛnw kama i n’a fɔ kanjabana, walima ni den bɛ ka fɔɔnɔ kojugu ani n’a tɛ se ka fɛn kunu.

Banakisɛ­fagalan tɔw tali kuntaala tɛ kelen. Aw bɛ tɛmɛ ni fura tali ye fo bana taamasiɲɛ (hali farigan yɛrɛ) bɛɛ ka ban ka lɛri 24 ɲɔgɔn kɛ. Ni Sida bɛ den na, tile hakɛ min fɔlen don a kama aw bɛ fura di a ma o kɔnɔ. O fɔlen in kɔnɔ, a tata hakɛ bɛ se ka yɛlɛma. A ka ca a la, aw bɛ hakɛ dita dɔgɔya ni di den ka dɔgɔn walima ni a man kɛnɛ. Aw bɛ sɔrɔ ka dita hakɛ caya ni di den ka bon walima ni bana ka jugu.

Amɔkisisilini dunta, Amoxicilline orale: Denw ka bana suguya caman fura

Miligaramu 25 ka se 50 ma, aw bɛ o di den ma a girinya kilogaramu kelen o kelen na don o don, a tilalen ka bɛn tako 3 ma tile kɔnɔ. Walima aw bɛ a di ka bɛn den si hakɛ ma:

• San 3 duguma: aw bɛ mg 62 di siɲɛ saba tile kɔnɔ tile 3 ka se tile 7 ma.
• San 3 ka se san 7 ma: aw bɛ mg 125 di siɲɛ 3 tile kɔnɔ tile 3 ka se tile 7 ma.
• San 8 ka se san 12 ma: aw bɛ mg 250 di siɲɛ 3 tile kɔnɔ tile 3 ka se tile 7 ma.
• San 12 sanfɛ: aw bɛ mg 250 ka se mg 500 ma, k’o di siɲɛ 3 tile kɔnɔ walima
  mg 500 ka se mg 875 ma, o siɲɛ 2 tile kɔnɔ tile 3 ka se tile 7 ma.

Aw bɛ tɛmɛ ni amɔkisisilini dili ye fo ka t’a fɔ ko bana taamasiɲɛ bɛɛ banna ka lɛri 24 ɲɔgɔn sɔrɔ.

Ni bana gɛlɛnw don, aw bɛ se ka dili se fo mg 95 ɲɔgɔn ma kg la, aw bɛ tako 3 ma tile kɔnɔ.

Galakanɔrɔ kama

Aw bɛ mg 25 di kilogaramu o kilogaramu, siɲɛ 2 tile kɔnɔ tile 5 kɔnɔ.

Anpisilini, Ampicilline

Aw bɛ a pikiri mg 100 kɛ ka se 200 ma, a tigi la a kilogaramu kelen o kelen, a tilalen ka bɛn tako 3 walima tako 4 ma tile kɔnɔ fo ka nɔgɔya. Ni o kɛra, aw bɛ a pikiri jɔ ka a tɔ kɛ a kununta ye.

• Denyɛrɛninw: aw bɛ a pikiri mg 125 kɛ den na (mg 500 bara ¼) siɲɛ 3 tile kɔnɔ
• Kalo 1 ka taa san 1 na: aw bɛ a pikiri mg 250 kɛ den na (mg 500 bara ½) siɲɛ 4 tile kɔnɔ
• San 1 ka se san 3 ma: aw bɛ a pikiri mg 500 kɛ den na siɲɛ 4 tile kɔnɔ
• San 4 ka se 7 ma: aw bɛ a pikiri mg 750 kɛ den na siɲɛ 4 tile kɔnɔ
• San 8 ka se 12 ma: aw bɛ a pikiri mg 1.000 kɛ den na siɲɛ 4 tile kɔnɔ
• San 12 ka yɛlɛn: aw bɛ a pikiri mg 1.500 kɛ den na siɲɛ 4 tile kɔnɔ

Ni bana ka gɛlɛn

Aw bɛ hakɛ kofɔlen ninnu ɲɔgɔn 2 di. Ni aw sɔminen don a la ko bana ye kanjabana ye walima galakanɔrɔ gɛlɛman, aw bɛ anpisilini ni zantamisini fila nagaminen pikiri kɛ a la I n’a fɔ a ɲɛfɔlen don cogo min duguma). Ladilikanw lajɛ ɲɛ Zantamisini, Gentamicine.

Sigida 9, Labɛn ni ladilikan minnu ka kan ka matarafa pikiri kɛcogo kan, yɔrɔ lajɛ gafe kɔnɔ walasa ka pikiri kɛcogo dɔn. Aw bɛ anpisilini mg 500 kɛ ji sanuman ml 2.1 la. O bɛ furaji bɛ bɛn mg 500 ma ml 2.5 la. Aw bɛ zantamisini (gentamicine) mugu mililitiri 2 ka se a mugu mililitiri bara baranin ta k’o ta ta miligaramu 40 ye ka kɛ mililitiri kelen-kelen na.

Anpisilini ni zantamisini, Ampicilline et gentamicine

Kilogaramu kelen o kelen, aw bɛ anpisilini pikiri (ampicilline) mg 50 kɛ a tigi la, siɲɛ 4 tile kɔnɔ, tile 5 ɲɔgɔn kɔnɔ.

NI

Kilogaramu kelen o kelen, aw bɛ zantamisini pikiri (gentamicine) mg 7.5 kɛ a tigi la siɲɛ 1 tile kɔnɔ, tile 5 ɲɔgɔn.

• Den kalo 2 ka se 4 ma, ni a tigi girinya bɛ kg 4 na ka se 5.9 ma: aw bɛ anpisilini ml 1 pikiri kɛ siɲɛ 4 tile kɔnɔ. Aw bɛ zantamisini ml 0.5 ka se ml 1 ma pikiri kɛ siɲɛ 1 tile, fo ka se tile 5 ɲɔgɔn ma o la don o don.
• Den kalo 4 ka se 12 ma, ni a girinya bɛ kg 6 la ka se 9.9 ma: aw bɛ anpisilini ml 2 pikiri kɛ o la siɲɛ 4 tile kɔnɔ. Aw bɛ zantamisini ml 1.8 pikiri kɛ o la siɲɛ 1 tile kɔnɔ ka se tile 5 ma.
• Den san 1 ka se 3 ma, ni a tigi girinya bɛ kg 10 bɔ ka se 13.9 ma: aw bɛ anpisilini ml 3 pikiri kɛ o la siɲɛ 4 tile kɔnɔ. Aw bɛ zantamisini ml 1.9 ka se 2.7 ma pikiri kɛ o la siɲɛ 1 tile kɔnɔ ka se tile 5 ma.
• Den san 4 ka se san 5 ma, n’a girinya bɛ kg 14 bɔ ka se 19 ma: aw bɛ anpisilini ml 5 pikiri kɛ o tigi la siɲɛ 4 tile kɔnɔ. Aw bɛ zantamisini ml 2.8 ka se ml 3.5 ma, o pikiri kɛ o tigi la siɲɛ 1 tile kɔnɔ.

Aw bɛ zantamisini hakɛ dita dɔgɔya denmisɛnw ma minnu girinya ka dɔgɔn ni tɔw ye, ani k’a hakɛ dita caya denmisɛnw ma minnu ka girin ni tɔw ye.

Ni aw dalen don a la jaati ko bana min bɛ den na k’o ye kanjabana ye, aw bɛ anpisilini hakɛ caya ka se mg 200 ɲɔgɔn ma kilogaramu kelen o kelen aw bɛ o pikiri kɛ siɲɛ 4 tile kɔnɔ.

📖 Gafe kɔnɔkow
← Segin kɔfɛ | Taa ɲɛfɛ →