Bana min bɛ sɔrɔ nɔnɔkɛnɛ wulibali minni fɛ (La Brucellose)

Bana in bɛ mɔgɔ minɛ ni i ye ba nɔnɔ walima misi nɔnɔ wulibali min. A bɛ se ka mɔgɔ minɛ fana ni a tigi fari yɔrɔ dɔ basira ka a to nin bagan kofɔlen ninnu cɛ la walima ni a bɛ yɔrɔ min, banakisɛ in bɛ o dugukolo la.

Walasa ka kisi nɔnɔkɛnɛbana ma: aw kana nɔnɔkɛnɛ wulibali min abada.

Nɔnɔkɛnɛbana taamasiɲɛw

• A daminɛ na farigan ni nɛnɛ bɛ se ka kɛ a sen kɔrɔ, nka tuma caman nin bana in bɛ daminɛ ni farikolosɛgɛn, fangadɔgɔya ni dumunikɛbaliya, ani kungolodimi ni kɔnɔdimi ye, ani tuma dɔw la dimi bɛ kɛ a tigi kolotugudaw, a fasaw, ani a kolow la.
• A bɛ se ka kɛ, a farigan bɛ juguya i n’a fɔ a tɛ juguya cogomin. A ka ca a la, nɛnɛ bɛ a tigi minɛ wulafɛ ka laban ni wɔsili ye sufɛ. Ni a juguman don, farigan bɛ ban ka tile damadama kɛ ka tila ka segin ka na. Ni a ma furakɛ a bɛ se ka san caman kɛ a tigi la.
• Gɛnɛgɛnɛ bɛ bɔ a tigi kamankɔrɔla ni worokɔrɔla la (gafe ɲɛ Joli juguyali taamasiɲɛw lajɛ).

A furakɛcogo

• Ni aw sɔmina hali dɔɔni ko nɔnɔkɛnɛbana don, aw ye taa aw yɛrɛ lajɛ dɔgɔtɔrɔso la, ka da a kan aw bɛ se ka bana in kɛ bana wɛrɛ ye ka sɔrɔ o tɛ, barisa bana in furakɛli kuntaala ka jan wa a da ka gɛlɛn. Aw kana fura si kɛ dɔgɔtɔrɔ ma min yamaruya.
• Aw bɛ a furakɛ ni tetarasikilini ye (tétracycline), balikuw bɛ miligaramu 250 forokoni 2 ta, siɲɛ 4 tile kɔnɔ fo dɔgɔkun 3. Walasa ka fura tacogo dɔn, aw bɛ sɛbɛn ɲɛ Tetarasikilini lajɛ. Walima aw bɛ kotirimɔkizazɔli (cotrimoxazole) ta. (Walasa ka a tata hakɛ ni a kɔlɔlɔw dɔn, aw ye sɛbɛn ɲɛ Kotiri, Cotrimoxazole, TMP-SMX lajɛ).

Nɔnɔkɛnɛbana kɛlɛcogo

• An bɛ nɔnɔ minnu min, olu ka kan ka wuli. Aw kana nɔnɔ wulibali min abada, wa aw kana naare dun min dilanna ni nɔnɔ wulibali ye. Ni aw sigilen don yɔrɔ la nɔnɔkɛnɛbana bɛka dankari mɔgɔw la yɔrɔ min na, a ka fisa aw kana naare dun min dilanna nɔnɔ wulibali la.
• Mɔgɔ minnu bɛ misiw ni ba marayɔrɔw la, olu ka kan ka u janto u fari la kosɛbɛ a kana basi.
• Aw bɛ sɔgɔsɔgɔnijɛfuraw kɛ misiw ni baw la. Aw bɛ bagandɔgɔtɔrɔw dɛmɛ minnu bɛ aw ka baganw ka kɛnɛya jateminɛ.

📖 Gafe kɔnɔkow
← Segin kɔfɛ | Taa ɲɛfɛ →