Furulabanaw fura farinmanw (ɲumanw)

Fura suguya kuraw bɛ yen minnu bɛ furudimi ni nsɔnkunan kɛlɛ ka ɲɛ ka tɛmɛ kɔrɔlenw kan, nka u da ka gɛlɛn. Kumukɛlɛlan suguya fila bɛ yen minnu bɛ wele ko ɲɔgɔnkɛlɛlanw.

Nin suguya fila in na, furudimifura minnu bɛ wele ko IPP, olu de ka ɲi kosɛbɛ, nka olu de fana da ka gɛlɛn. A suguya fila in bɛɛ furaw ka ɲi. Aw bɛ u dɔ san, aw yɛrɛ hakili la min da ka nɔgɔn.

Omeparazɔli, Oméprazole

A bɛ sɔrɔ

• Furamugu, ji bɛ kɛ min na: miligaramu 20 ni miligaramu 40 forokow
• Forokoni: miligaramu 10, miligaramu 20 ani miligaramu 40.

Omeparazɔli bɛ i n’a fɔ furudimifura tɔw, a bɛ se ka dimi mada ani ka furudimi kɛnɛya. Walasa ka furudimi furakɛ, aw kana fosi wɛrɛ ta fo omeparazɔli dɔrɔn dɔgɔkun 8 kɔnɔ. Ni furudimi seginna kɔ, aw bɛ segin ka omeparazɔli ta, ka tila ka banakisɛ­fagalanw fara a kan walasa ka dimi in furakɛ. Aw bɛ gafe ɲɛ Furudimi kunbɛncogo ni a furakɛcogo lajɛ walasa ka a dɔn fura minnu ka kan ka fara a kan ka furakɛli kɛ.

Ni omeparazɔli jɔyɔrɔ ma ye, aw bɛ furudimifura wɛrɛ lajɛ.

A tacogo

• Aw bɛ a miligaramu 20 fo ka se miligaramu 40 di don o don.
• Aw bɛ fɔlɔ ka a miligaramu 20 di, ni dimi tɛka mada, aw bɛ a miligaramu 40 di.

Ni furudimi walima dimi seginna kɔ kalo 6 omeparazɔli talen kɔfɛ, aw bɛ banakisɛ­fagalanw ta ka furudimi furakɛ. Aw ye gafe ɲɛ nataw lajɛ.

Ranitidini, Ranitidine (Izinitigiw ka tɔgɔ dalen: Zantaki, Zantac)

Tuma dɔw a furakisɛlama miligaramu 150 walima 300 bɛ sɔrɔ.

Ratidini ye kumujiyɛlɛnfura ye. I n’a fɔ kumujiyɛlɛnfura tɔw, a bɛ se ka furulajoli furakɛ ka a kɛnɛya. Nka ni dimi wulila kalo 6 ratidini talen kɔfɛ, aw bɛ se ka banakisɛ­fagalanw fana kɛ ka a furakɛ. Aw ye gafe ɲɛ nataw lajɛ.

A tacogo

Aw bɛ a miligaramu 150 di tile kɔnɔ siɲɛ fila, walima a miligaramu 300 surafanadun waati, dɔgɔkun 4 fo dɔgɔkun 8.

Furalajoli furakɛcogo (Traitement pour les ulcères)

Aw bɛ furudimifura ni banakisɛ­fagalan di ɲɔgɔn fɛ. Fura fila in ɲagaminen ɲuman bɛ sɔrɔ. Furudimifura ni banakisɛ­fagalan suguya fila bɛ a fura caman na.

Bisimuti fana bɛ fara fura ninnu kan tuma dɔw la. Ni furudimifura tɛ aw bolo, kumujiyɛlɛnfura bɛ se ka bila o nɔ na.

Fura ninnu ɲagaminen misali dɔ filɛ:

Omeparazɔli (miligaramu 40), (walima furudimifura wɛrɛ) aw bɛ o ta dɔgɔkun 1 ka se dɔgɔkun 2 ma

ANI

metoronidazɔli (métronidazole) miligaramu 500, siɲɛ fila dɔgɔkun 1 kɔnɔ ka se dɔgɔkun 2 ma

ANI

Amɔkisisilini (amoxicilline) miligaramu 500, siɲɛ 3 tile kɔnɔ dɔgɔkun 1 ka se dɔgɔkun 2 ma.

Walima a kɛcogo wɛrɛ filɛ

Omeparazɔli (oméperazole) miligaramu 40, (walima furudimifura wɛrɛ) siɲɛ kelen tile kɔnɔ dɔgɔkun 1

ANI

Metoronidazɔli (métronidazole) miligaramu 250, siɲɛ 4 tile kɔnɔ dɔgɔkun 1

ANI

Tetarasikilini (tétracycline) miligaramu 500, siɲɛ 4 tile kɔnɔ dɔgɔkun 1

ANI

Bisimuti miligaramu 25, siɲɛ 4 tile kɔnɔ dɔgɔkun 1

Aw kana tetarasikilini ni busimuti ta ɲɔgɔn fɛ. Ni aw ye kelen ta, aw bɛ a to lɛri 2 ɲɔgɔn ka se 3 ma, ka sɔrɔ ka tɔkelen dɔ in ta.

📖 Gafe kɔnɔkow
← Segin kɔfɛ | Taa ɲɛfɛ →