Kɔnɔ­magayalan (kɔnɔjafura)

Kɔnɔ­magayalan ni kɔnɔfiyɛlan kɛcogo ɲuman ni u kɛcogo jugu kɔlɔlɔw ɲɛfɔlen don gafe ɲɛ Kɔnɔfiyɛ furaw kɛcogo ɲuman la.

Mɔgɔw ye u yɛrɛ deli kɔnɔ­magayalanw na kojugu. U dun ka kan ka ta waati dɔw de la walasa ka kɔnɔ magaya. Aw kana kɔnɔ­magayalan di kɔnɔbolitɔ ma walima kɔnɔdimitɔ walima farilajidɛsɛtɔ abada. Aw kana kɔnɔ­magayalan di den ma, den min tɛ san 2 bɔ.

A ka ca a la dumuni fumaw de ye kɔnɔ­magayalan ɲumanw ye, dumuni fumaw i n’a fɔ sumanbuw walima bananku. Ji camanmin (jifilen ɲɛ 8 tile kɔnɔ) ani jiriden camandun fana nafa ka bon.

Maɲeziyɔmu nɔnɔ (idɔrɔkisidi de maɲeziyɔmu, hydroxyde de magnésium): kɔnɔ­magayalan ni kumukɛlɛlan

Ale nɔnɔjilama bɛ sɔrɔ.

Sani aw ka a min, aw bɛ a yuguyugu kosɛbɛ fɔlɔ. Ni aw ye a min tuma o tuma, aw bɛ ji min a kan.

A tata hakɛ:

Kumukɛlɛ la:

• Baliku ni den minnu ka ca ni san 12 ye: kafeminkutu ɲɛ 1 ka se ɲɛ 3 ma siɲɛ 3 ka se siɲɛ 4 ma don o don.
• Den san 1 ka se san 12 ma: kafeminkutu ɲɛ ½ ka se ɲɛ 1 ma siɲɛ 3 ka se siɲɛ 4 ma don o don.

Kɔnɔ­magayalan na, aw bɛ a ta aw dawaati:

• Baliku ni den minnu ka ca ni san 12 ye: dumunikɛkutu ɲɛ 2 ka se ɲɛ 3 ma.
• Den san 6 ka se san 11 ma: dumunikɛkutu ɲɛ 1 ka se ɲɛ 2 ma
• Den san 2 ka se san 5 ma: dumunikɛkutu ɲɛ ⅓ ka se ɲɛ 1 ma
• Aw kana a di den ma min tɛ san 2 bɔ

Ɛpisɔmu kɔkɔma, Sels d’Epsom (maɲeziyɔmu silifatilama, sulfate de magnésium): kɔnɔ­magayalan ani ŋɛɲɛfura

A mugulama walima a kurulama bɛ sɔrɔ

Ɛpisɔmu kɔkɔma tata hakɛ:

Walasa ka aw kɔnɔ magaya dɔɔni dɔrɔn:

Aw bɛ ɛpisɔmu kɔkɔma kɛ ji la ka o min (a ka fisa aw dumunikɛbali ka a min)

• Baliku: kafeminkutu ɲɛ 2
• Den san 6 ka se san 12 ma: kafeminkutu ɲɛ ½ ka se ɲɛ 1 ma
• Den san 2 ka se san 6 ma: kafeminkutu ɲɛ ¼ ka se ɲɛ ½ ma
• Den min tɛ san 2 bɔ: Aw kana a di den ma.

Walasa ka ŋɛɲɛ kɛlɛ

Aw bɛ kafeminkutu ɲɛ 8 ɛpisɔmu kɔkɔma mugu kɛ ji litiri 1 na ani ka to ka finimugu walima bandi su o la ka a da ŋɛɲɛma yɔrɔ la.

Duntulu-kɔnɔ­magayalan

Kokotɔ minnu kɔnɔ bɛ ja, u bɛ dimi sɔrɔ banakɔtaa senfɛ, olu bɛ nin tulu kofɔlen min tuma dɔw. Tiɲɛ yɛrɛ la, a tɛ kɔnɔ magaya, nka a bɛ tulu kɛ banakɔtaa la. Dumuni fumaw de ka fisa, i n’a fɔsumanbuw ni bananku.

A tulu in dunta hakɛ kɔnɔmagayali la:

Baliku ni denmisɛnni minnu ka ca ni san 12 ye, olu ka minta: dumunikɛkutu ɲɛ 1 ka se 3 ma, lɛri 1 surafana kɔfɛ. Aw kana a ni dumuni dun waati kelen na barisa a bɛ se ka witamini dɔw faga ka bɔ dumuni na.

Aw ye aw janto nin na: aw kana a di den ma min tɛ san 12 bɔ, walima musokɔnɔmaw, denbatigiw, walima mɔgɔ minnu wulili ka gɛlɛn ka bɔ dilan kan ani fɛnw kununi ka gɛlɛn mɔgɔ minnu bolo.

Giliserini, Glycérine, min bɛ don banakɔtaa yɔrɔ la

Furakisɛ don min bɛ don banakɔtaa yɔrɔ la. A bɛ banakɔtaa nege bila mɔgɔ la ani ka a bɔli nɔgɔya.

Baliku ni denmisɛnni san 12 ka giliserini donta hakɛ banakɔtaa yɔrɔ la:

• Aw bɛ a kisɛ 1 don aw banakɔtaa yɔrɔ la, ani ka a to yen fo miniti 15 ka se miniti 30 ma (a donni ka nɔgɔn ni aw ye aw da). Ni aw ye a to a ka mɛn aw kɔnɔ, o bɛ a to a ka baarakɛ ka ɲɛ.

📖 Gafe kɔnɔkow
← Segin kɔfɛ | Taa ɲɛfɛ →