Sidabanafura

Furasi ma sɔrɔ fɔlɔ min bɛ sidabana furakɛ, nka fura minnu bɛ wele atiretorowirali o bɛ se ka sidatɔw dɛmɛ u ka ɲɛnɛmaya kuntaalajan sɔrɔ kɛnɛya kɔnɔ, fura ninnu tali bɛ se ka a to sidabana tɛ jɛnsɛn. Aw bɛ fura 3 fara ɲɔgɔn kan ka u ta don o don, olu bɛ wele antiretorowirali furakɛli walima arv. Kotirimɔkizazɔli (aw ye gafe ɲɛ Kotiri (Cotrimoxazole, TMP-SMX) lajɛ) bɛ se ka sidatɔw tanga bana misɛnni caman ma.

Baarada minnu sigilen don sidabana furakɛli ani a furakisɛw dili kama

Kabini aw bɛ a dɔn ko sidabana bɛ aw la jolisɛgɛsɛgɛ kɔfɛ, aw bɛ a lajɛ ka sidabana fukɛli yɔrɔ dɔ ɲini kɛnɛbaarakɛlaw bɛ se ka aw lajɛ yɔrɔ min, ka aw furakɛ teliyala ani ka aw bila furaw kan.

A bɛ dɔn cogodi ko banabagatɔ mako bɛ furaw la?

• Sidabana bɛ mɔgɔ minnu na, olu mako bɛ furaw la, kɛrɛn­kɛrɛnnenya la ni u farikolo bɛka dɛsɛ ka bana kɛlɛ jolisɛgɛsɛgɛ min bɛ a to banakisɛ hakɛ bɛ dɔn joli la (CD4), o bɛ se ka a to a bɛ dɔn ni farikolo bɛ se ka bana kɛlɛ. Ni sidanakisɛ hakɛ tɛ 500 bɔ, hali ni o ye a sɔrɔ aw hakili la bana tɛ aw la, aw bɛ kuma aw ka dɔgɔtɔrɔ fɛ fura tali daminɛniko la.
• Sidabana ni sɔgɔsɔgɔninjɛ walima sayi mana ye mɔgɔ min na, o tigi ka kan ka fura tali daminɛ.
• Musokɔnɔmaw ka kan ka furaw tali daminɛ joona joona walasa ka u yɛrɛkun ka kɛnɛya tanga ani u den.
• Den ni denmisɛnni minnu ma san 5 sɔrɔ olu mako bɛ sidafura la walasa u ka mɔdiya ani ka kɛnɛya sɔrɔ.
• Sidafura bɛ se ka a to furuɲɔgɔnmaw tɛ sidaba yɛlɛma ɲɔgɔn fɛ ni o ye a sɔrɔ bana bɛ kelen na, a tɛ tɔ kelen na.

Aw ye aw magɛrɛ mɔgɔ la, aw dalen don min na walima sidabana furakɛli jɛkulu dɔ walasa olu ka aw dɛmɛ furaw tali la don o don, o de nafa ka bon.

Aw kana sidafura tali daminɛ aw yɛrɛ ma. A bɛ se ka kɛ aw tɛ aw ka fura tata dɔn, ani fana kɔlɔlɔba bɛ se ye a kɔ walima bana kologɛlɛyali fura kɔrɔ.

Aw kana sidafura di mɔgɔsi ma. Fura tɛ mako ɲɛ aw ye ni aw ma se a tata hakɛ kofɔlen ma.

Aw kana sidafura san mɔgɔsi fɛ mɔgɔ min tɛ baarakɛ sidabana furakɛli jɛkulu dɔ la. Ni aw bɛ fura ta sidabana furakɛli jɛkulu dɔ fɛ, o tɛ kɔtigɛ wa o da ka di ka tɛmɛ kɛnyɛrɛye tigilamɔgɔw ta kan.

📖 Gafe kɔnɔkow
← Segin kɔfɛ | Taa ɲɛfɛ →