Sigida 4 Banabagatɔ furakɛcogo

Furakɛli kɛrɛn­kɛrɛnnenw ka a ɲɛsin banabagatɔ gɛlɛn ma

Jimafɛnw

Ja

Banabagatɔ ka jimafɛnw minni nafa ka bon kosɛbɛ. Ni a tɛ jimafɛn caman min, aw ye to ka dɔ di a ma waati bɛɛ. Ni a minni ka gɛlɛn a ma, aw bɛ dɔɔni dɔɔni di a ma miniti 5 o miniti 5 walima miniti 10 o miniti 10.

Aw ye banabagatɔ ka jimafɛn minta suman tile kɔnɔ. Baliku ka kan ka ji litiri 2 ni kɔ min tile kɔnɔ. A ka kan ka mililitiri 250 ɲɛgɛnɛ kɛ siɲɛ 3 fo ka se siɲɛ 4 ma tile kɔnɔ. Ni a tɛ ji caman min, a tɛ ɲɛgɛnɛ caman kɛ walima ni farilajidɛsɛ taamasiɲɛ wɛrɛw bɛ a la, a wajibiyalen don a ka ji caman min. A ka kan ka jimafɛn nafama kɔgɔmaw min (sɛbɛn ɲɛ Kɛnɛyaji lajɛ). Aw bɛ se ka minfɛn di a ma, min bɛ farikolo nafa. Ni a tɛ se ka ji min, aw ye dɔgɔtɔrɔ ɲini min bɛ sɔrɔmuji kɛ a la. Ni banabagatɔ bɛ se ka ji min dɔɔni dɔɔni, nafa tɛ sɔrɔmuji kɛli la tuguni.

Dumuniw

Ni banabagatɔ tɛ se ka dumuni girimanw dun, aw ye najiw, nɔnɔ, jiridennɔnɔw ani jimafɛn nafama wɛrɛw di a ma (Sigida 11 Balo nafama min bɛ kuma balo kan, aw ye o lajɛ).

Seri ni malojiw ka ɲi, nka a ni dumuni nafama wɛrɛw ka kan ka di a ma ɲɔgɔn fɛ. Aw bɛ se ka shɛfan, shɛ, jɛgɛ walima sogoshilen najiw tobi ka di a ma. Ni banabagatɔ tɛ dumuni caman dun, o la, a ka kan ka dumuni dɔɔni dɔɔni dun siɲɛ caman tile kɔnɔ.

Saniya

Saniya nafa ka bon kosɛbɛ banabagatɔ ma. A ka kan ka ko ji wɔlɔkɔlen na don o don.

A ka daraw ka kan ka falen don o don ni u nɔgɔra. Ni bana yɛlɛmata don, aw ye aw yɛrɛ kɔlɔsi banabagatɔ ka finiw, a ka daraw ni a ka sɛrɛbɛtiw la, sankoni u ɲiginnen don walima ni joli bɛ u la. Walasa ka u banakisɛw ni banakisɛw faga, aw ka kan ka u ko jikalan ni safinɛ walima jawɛliji la.

Banabagatɔ yɛlɛmacogo dilan kan

Fanga tɛ banabagatɔ min na, ni a tɛ se ka a yɛlɛma a yɛrɛ ye. Aw ye a dɛmɛ siɲɛ caman tile kɔnɔ a ka a yɛlɛma. O cogo de la an bɛ se ka a farikolo tanga jolisu ma. Walasa ka kunnafoni sɔrɔ jolisu kɛlɛcogo ni a furakɛcogo kan, (aw ye sɛbɛn ɲɛ Joli minnu bɛ bɔ banabagatɔ la ka a sababu kɛ yɛlɛmabaliya ye dilan kan lajɛ).

Den min mɛnna bana na, o ka kan ka da a ba sen kan. A yɛlɛma yɛlɛmani bɛ se ka a tanga kɛrɛdimi ma. O ye bana ye min ka teli ka banabagatɔ degunnenw sɔrɔ, minnu dalen bɛ mɛn dilan kan. Ni farigan bɛ banabagatɔ la, a bɛ sɔgɔsɔgɔ, ani ni a ninakili ka teli, o bɛ se ka kɛ kɛrɛdimi ye (aw ye sɛbɛn ɲɛ Galakanɔrɔ (fogonfogonnabana) lajɛ).

Aw ye jateminɛ kɛ ni yɛlɛma bɛ ka don bana na

An ka kan ka jateminɛ kɛ ni bana bɛ ka juguya walima ni a bɛ ka nɔgɔya. Aw ye aw hakili to nin fɛn ninnu na siɲɛ naani tile kɔnɔ:

Farikolo funteni hakɛ

Ja

Dusukun tantanni hakɛ miniti kelen kɔnɔ

Ja

Ninakili hakɛ miniti kelen kɔnɔ

Ja

Aw ye aw hakili to a ka ji minta, ɲɛgɛnɛ kɛta ani banakɔtaa hakɛ la tile kɔnɔ. Aw ye banabagatɔ ka kunnafoniw bɛɛ sɛbɛn ka lase dɔgɔtɔrɔ ma.

Ja

Banabagatɔ kɔrɔsigibaga ka kan ka jateminɛ kɛ bana juguw taamasiɲɛw na. Banajugu ninnu taamasiɲɛw bɛ sɔrɔ sɛbɛn ɲɛ nata la. Ni banabagatɔ ka bana bɛ nin taamasiɲɛw dɔ jira, aw ye dɛmɛ ɲini dɔgɔtɔrɔ fɛ teliya la.

📖 Gafe kɔnɔkow
← Segin kɔfɛ | Taa ɲɛfɛ →