Sigida 17 Ɲinw, ɲintaraw ani dakɔnɔna
Nin nɛn ye fara jɛman da: bana dɔw bɛ yen, farigan bɛ minnu senkɔrɔ, olu bɛ nɛn ni nagalo minɛ ka u jɛ. Hali ni o tɛ kojugu ye, aw ka kan ka aw da ko siɲɛ 3 walima siɲɛ 4 tile kɔnɔ ni ji wɔlɔkɔlen kɔkɔma ye, bikaribonati bɛ min na.
Ni nin nɔgɔ jɛman bɛ den da kɔnɔ ka farigan kɛ a senkɔrɔ, o bɛ ɲɔni taamasiɲɛ fɔlɔw kofɔ (aw ye sɛbɛn ɲɛ Ɲɔninsa lajɛ).
Nɔ jɛmanw: Ni nɔ jɛmanw bɛ dakɔnɔna na, nɛn kan ani nagalo la, o ye bugunbana dɔ taamasiɲɛ ye min bɛ wele tubabukan na ko moniliose walima muguet. A bɛ nɔw bila mɔgɔ dɔw dakɔnɔna na i n’a fɔ den, sidabanatɔ, walima mɔgɔ minnu bɛka banakisɛfagalanw ta, anpisilini walima tetarasikilini ni a bɔsɔnw.
Ni aw ma dɛsɛ, aw bɛ o banakisɛfagalan tali jɔ. Aw bɛ aw da ko ni pɛrimanganati (violet de gentiane) ye walima ni ji ye, bikaribonati bɛ min na; den min ka nin bana in ka jugu, aw bɛ nisitatini (nystatine) di o ma. Aw ye sɛbɛn ɲɛ Nisitatini, Nystatine lajɛ. Nɔnɔkumu minni fana jɔda ka bon nin bana in furakɛli la. Ni bana in ka jugu kosɛbɛ walima ni bugun sera ngɔɔnɔ na min bɛ dumuni kununi gɛlɛya, aw bɛ kɛnɛyabaarakɛla dɔ ka dɛmɛ ɲini. O bana ka kan ka furakɛ ni fura ɲɛnama ye.
Joli basigilenw da kɔnɔ: Tomi jɛmanniw ninnu bɛ bɔ mɔgɔ dakɔnɔna na, dakuw la, dimi bɛ minnu na, ni mura walima farigan bɛ a tigi la. U bɛ tunu tile damadɔ kɔfɛ. Aw bɛ aw da ko ni ji ye, bikaribonati bɛ min na ani ka aw da kucukucu ni ji suma ye walima ni bile de metilɛniji ye (bleu de méthylène). Banakisɛfagalan jɔda tɛ nin bana in furakɛli la.