Sigida 22 Mɔgɔkɔrɔba banaw
A ka ca a la, mɔgɔkɔrɔbaw labɛnnen don ka saya makɔnɔ ka tɛmɛ u fɛmɔgɔw yɛrɛ kan. Mɔgɔ minnu ye u ka diɲɛlatigɛ diya bɔ a ka ca a la olu tɛ siran saya ɲɛ ka da a kan ɲɛnɛmaya laban ye saya ye.
Tuma caman, an bɛ a lajɛ ka mɔgɔ satɔ dɛmɛ cogo bɛɛ la walasa a kana sa. Waati dɔw la o bɛ dɔ fara banabagatɔ ni a kɛrɛfɛ mɔgɔ bɛɛ ka sɛgɛn kan. A dɛmɛcogo tɛ fura ɲuman walima dɔgɔtɔrɔ ɲuman sɔrɔli ye nka a ka fisa ka gɛrɛ a tigi la ka bɛrɛbɛrɛ. Aw ye a jira a tigi la ko aw ni a ye nisɔndiyako ni gɛlɛya minnuw sɔrɔ ɲɔgɔn fɛ ko aw tɛna ɲinɛ olu kɔ, ani ka jira a la ko aw yɛrɛ limaniyara ni a ka saya ye. A ka waati labanw kɔnɔ bɛrɛbɛrɛli ka fisa a ma ka tɛmɛ fura kan.
A ka di mɔgɔkɔrɔba bananenw ye ka to u ka so u ka denbaya kɛrɛfɛ ka tɛmɛ dɔgɔtɔrɔso kan. Hali ni o bɛ a jira ko a tigi bɛna sa joona, nka o tɛ ko jugu ye. An ka kan ka an janto a tigi haminankow ni a makow la ani an yɛrɛ taw. Waati dɔw la, mɔgɔ min bɛna sa, o bɛ sɛgɛn kojugu ka a sababu kɛ a bɛ a dɔn ko ale furakɛli musakaw bɛna gɛlɛya lase a ka denbaya ma. O waati la, a bɛ saya fisaya ni ɲɛnɛmaya ye.
Nka mɔgɔ dɔw bɛ siran saya ɲɛ. Hali ni u degunnen don, a bɛ se ka gɛlɛya u ma ka taa ka diɲɛ in to. Laada bɛɛ ni a ka faamuyalicogo don saya kan ani ɲɛnɛmaya saya kɔfɛ. O hakilina, danaya ani o laadaw bɛ se ka saya nɔgɔya dɔw bolo.
Saya bɛ se kɛ yɔrɔninkelen ko ye walima donjan ko. An bɛ se ka fɛn min kɛ walasa ka an fɛmɔgɔ labɛn ka saya makɔnɔ hali ni o ye a sɔrɔ ko nɔgɔn tɛ. A ka ca a la, an bɛ se ka fɛn minnu kɛ o de ye ka a tigi dɛmɛ, ka muɲu a kɔrɔ ani ka a faamu.
Denmisɛnni saya fansi man nɔgɔn. Ɲumanya ni hɔrɔnya bɛɛ nafa ka bɔn. Waati dɔw la ni den walima mɔgɔ wɛrɛ bɛna sa, a tigi bɛ a dɔn, a yɛrɛ farikolo la walima a kɛrɛfɛ mɔgɔw kɛcogo fɛ. Ni saya bɛna se mɔgɔkɔrɔba walima denmisɛnni ma, ni a ye aw ɲininka a ka saya la, aw ye tiɲɛ fɔ a ye nka aw ye a ɲɛfɔ a ye nɔgɔya la ni wajulikanw ye, walasa ka a hakilisigi. Ni aw bɛ a fɛ ka kasi aw bɛ se ka kasi, nka aw bɛ a jira a tigi la ko aw bɛ a fɛ, ani ko aw bɛ a ka saya kun. O bɛna fanga di ale yɛrɛ ma ka limaniya ni saya ye. Walasa a ka nin fɛn ninnu dɔn aw kana u fɔ aw da la, aw ka u jira aw kɛwale la.
An bɛɛ bɛ sa. Lala an ka kan ka baara ɲuman min kɛ, o de ye ka an mɔgɔɲɔgɔn dɛmɛ ka jɛn ni saya ye waati min a tɛ se ka bali, ani minnu bɛna to a kɔ, ka olu dɛmɛ ka a faamu.