Ladilikan ka a ɲɛsin dugu butigitigiw ni a fura feerelaw ma:

Ni aw bɛ fura feere aw ka butigi la, a ka ca a la, mɔgɔw bɛna aw ɲininka fura santaw la ani u tacogo. Aw ka a dɔn ko aw jɔyɔrɔ ka bon mɔgɔw lafaamuyali ni u ka kɛnɛya la.

Nin gafe in bɛna aw dɛmɛ ka kunnafoni ɲuman di ani ka a dɔn ko aw ka sannikɛlaw bɛna furaw san, u mako bɛ minnu yɛrɛ la.

Aw bɛ a dɔn ko mɔgɔw bɛ to ka u ka warini bɛɛ don furaw la, fura minnu tɛ mako ɲɛ u ye. Nka aw bɛ se ka u dɛmɛ u ka a faamu, u mako bɛ fura minnu yɛrɛ la, ani ka u ka wari bɔ a bɔkun na. Misali la:

• Ni mɔgɔw dɔ nana sɔgɔsɔgɔsiro ɲini, walima kɔnɔbolifura i n’a fɔ kaopɛkitati (Kaopectate), walima witamini B₁₂, walima biɲɛji walasa ka banamisɛnni dɔ furakɛ, walima penisilini walasa ka mugu furakɛ walima dimi dɔ, walima tetarasikilini, ni mura bɛ u la, aw bɛ a ɲɛfɔ olu ye ko o fura ninnu ɲɛci tɛ o banaw la, ko u yɛrɛ bɛ se ka kɔlɔlɔ lase mɔgɔ ma. Aw bɛ u bilasira.
• Ni mɔgɔ dɔ b’a fɛ ka kolokɛnɛya witamini san, aw bɛ a fɔ a ye ko a ka shɛfan, jiriden, walima nakɔfɛnw san o ka fisa witamini ye. Aw bɛ a lafaamu ko olu witamini ka ca ani u nafa ka bon wa u musaka man ca.
• Ni mɔgɔ dɔ ye aw ɲininka fura dɔ pikiri ko la, ka sɔrɔ o fura kelen dunta fana bɛ bana furakɛ, aw bɛ a fɔ a ye ko dunta de ka ɲi ani fana farati tɛ o la.
• Ni mɔgɔ dɔ b’a fɛ ka murafurakisɛw san walima fura ɲagaminen minnu da ka gɛlɛn, aw bɛ a fɔ o tigi ye ko a ka a ka wari mara ka asipirini, asetaminofɛni walima ibiporofɛni san ani ka o ta ni ji caman ye.

Ni aw ni mɔgɔw ye nin gafe in kɔnɔ kunnafoniw kalan ɲɔgɔn fɛ, a bɛ nɔgɔya aw bolo ka nin fɛn ninnu ɲɛfɔ u ye.

O bɛɛ kɔfɛ, a ɲininen don aw fɛ, aw ka fura nafamaw dɔrɔn feere. Furaw ni fɛn minnu kofɔlen bɛ aw ka so ni dugu fura maralanw kama, ani furaw ni fɛn wɛrɛ minnu nafa ka bon banaw kɛlɛli la aw ka sigida la, aw bɛ olu bila aw ka butigi kɔnɔ. Aw bɛ furaw san, fura minnu da ka nɔgɔn. A ɲininnen don aw fɛ fana, aw kana furaw feere, fura minnu tawaati tɛmɛna, walima fura minnu tiɲɛna, walima ɲɛci tɛ minnu na.

Aw ka butigi kɔnɔna bɛna kɛ yɔrɔ ye, mɔgɔw bɛna dɔnniya sɔrɔyɔrɔ min na u yɛrɛ ka kɛnɛya kan. Ni aw bɛ se ka mɔgɔ dɛmɛ u ka furaw tacogo ɲuman dɔn, ani ka da a la ko mɔgɔ o mɔgɔ bɛ fura san, ko o tigi ye kunnafoni ɲuman sɔrɔ fura tacogo, a tata hakɛ, a kɔlɔlɔw ni yɛrɛtangacogo kan, aw bɛna makoba de ɲɛ aw ka sigida­mɔgɔw ye. Ala ka a ɲɛ aw bolo!

📖 Gafe kɔnɔkow
← Segin kɔfɛ | Taa ɲɛfɛ →