Sidabanakisɛ tigilamɔgɔ walima sidatɔ ladoncogo

Aw bɛ se ka sidatɔ furakɛ ka a sɔrɔ a ma degun lase aw ma. Sidabanakisɛ tigilamɔgɔ ni sidatɔw ka kan ka ladon damu ni hakilisigi kɔnɔ. U mako bɛ dɛmɛ na fana ka se ka balo ɲuman ni fura sɔrɔ.

Ni farigan juguman ni kɔnɔboli walima farifanbɛɛdimi bɛ u la, o bɛ a jira ko u mako bɛ dɛmɛ na saniyako ta fanfɛ. A ka ca a la, an bɛ se ka o dɛmɛ don u ye ka a sɔrɔ a ma baasi lase an ma. Walasa ka sidabana bali ka jɛnsɛn, aw kana ɲinɛ:

• Ko joli, joginda, banakɔtaa jolima walima fɔɔnɔ jolima, o fɛn ninnu bɛ se ka kɛ sidabanakisɛ jɛnsɛnni sababu ye. Walasa aw kana maga banabagatɔ farilajiw la, aw bɛ gan walima manaforoko don aw bolo la ani ka to ka aw tɛgɛ ko tuma ni tuma.
• Finiw, dara ni seriwiyɛti nɔgɔlenw walima u jolimaw ka kan ka ladilan ni yɛrɛ kɔlɔsi ye. Aw bɛ u ko jikalan na ni safinɛ ye walima aw ka u ko ni jawɛliji ye. Aw kana o finiw ni sokɔnɔfinitɔw ko ɲɔgɔn fɛ.

Ni bana sera yɔrɔ dɔ ma, an tɛ se ka fɛn kɛ tuguni walasa ka sidatɔ furakɛ. A tigi somɔgɔw ni a teriw bɛ se ka a dɛmɛ ni hakilisigikumaw ye sani a ka saya don cɛ (a ye gafe ɲɛ Ka jɛn ni saya ye lajɛ).

📖 Gafe kɔnɔkow
← Segin kɔfɛ | Taa ɲɛfɛ →