Yɛrɛtangacogo sidabana ma

Hali bi, kunbɛnfura fosi ma sɔrɔ sidabana la.

Sidabana yɛlɛmali kafoɲɔgɔnya senfɛ, o bɛ se ka bali cogodi?

• Ka dan kafoɲɔgɔn kelen ma, ani ka tilen i kafoɲɔgɔn ye.
• Ka waleyaw kɛ kafoɲɔgɔnya waati, faratiba tɛ waleya minnu na (aw ye gafe ɲɛ Bangekɔlɔsi fɛɛrɛ lajɛ). Fugulan nafama donni bɛ sidabana yɛlɛmali farati dɔgɔya.
• Ni dilannabana dɔ bɛ aw la, aw bɛ o furakɛ joona.

Sidabana sɔrɔli minɛn nɔgɔlenw ni joli fɛ, o kunbɛncogo:

• Aw kana sɔn pikiri ka kɛ aw la ni aw dalen tɛ a la ko pikirikɛminɛnw banakisɛ fagalen don. Kɛnɛyabaarakɛlaw man kan ka biɲɛ kelen kɛ ka mɔgɔ fila sɔgɔ abada ka sɔrɔ u ma a tobi ka a banakisɛw faga (aw ye gafe ɲɛ Pikirikɛ minɛnw saniyacogo (tobicogo) lajɛ).
• Aw kana dɔrɔgu pikiri kɛ aw yɛrɛ la. Ni aw ma ɲɛ a kɔ, aw ni mɔgɔ kana jɛ biɲɛ kelen na, foni o ye a sɔrɔ aw ye a ko ni jawɛliji ye, walima ka a tobi jikalan na miniti 20 (mugan) ɲɔgɔn;
• Aw kana aw kunw di ni lamu kelen ye;
• Aw ka da a la ko bolokoliminɛnw, tulosɔgɔbiɲɛw, dasusubiɲɛw ani ladalako wɛrɛw kɛminɛn banakisɛw fagalen don;
• Aw kana sɔn joli sɛgɛsɛgɛbali ka kɛ aw la, walima aw bɛ aw balima wala aw teri dɔ joli kɛ aw la, aw dalen don a la ko sidabanakisɛ tɛ min joli la (nka, o don ka gɛlɛn ni a ma jolisɛgɛsɛgɛkɛ).
• Ni aw bɛ mɔgɔ dɔ joli furakɛ walima ka a farilaji jɔsi, aw bɛ aw jija ka gan walima mana don aw tɛgɛ la.

Sidabana yɛlɛmali den na ba fɛ, o kunbɛncogo

Ni sidabana bɛ musokɔnɔma na, a ka kan ka a dɔn ko a bɛ se ka a yɛlɛma a den na. Walasa ka kunnafoniw sɔrɔ sidabana yɛlɛmacogo la den fɛ, aw ye gafe ɲɛ Kɔnɔmaya lajɛ.

📖 Gafe kɔnɔkow
← Segin kɔfɛ | Taa ɲɛfɛ →