Bangekɔlɔsi fɛɛrɛ wɛrɛw

Fɛɛrɛ minnu bɛ don wolo kɔrɔ

Fɛɛrɛw don, minnu forokolamani don ni u bɛ don muso bolo wolo kɔrɔ. Fura dɔ bɛ o forokoni kɔnɔ min bɛ muso bali ka kɔnɔta kalo 3 fo san 5 ka a da a suguya kan. Forokoniw ka kan don a ɲɛdɔnbaga dɔgɔtɔrɔ dɔ fɛ, aw bɛ sɛbɛn ɲɛ Eritoromisini (Érythromycine) lajɛ.

I n’a fɔ bangekɔlɔsi furakisɛ ni, bangekɔlɔsi fɛɛrɛ minnu bɛ wolo kɔrɔ porojɛsitin dɔrɔn bɛ a dɔw la, wa muso minnu fari tɛ sɔn ɛsitorojɛni na, olu de bɛ se ka a don u la, walima den bɛ muso minnu sin na ni u ma u ka kalolabɔ ye kabini u jiginnen. Muso minnu fari tɛ sɔn bangekɔlɔsi furakisɛsi ma, o musow man kan ka wolo kɔrɔ bangekɔlɔsi fɛɛrɛw fana kɛ (gafe ɲɛ Muso jumɛn man kan ka bangekɔlɔsi fura ta?). Wolo kɔrɔ bangekɔlɔsi fɛɛrɛw tɛ sidabana ni dilannabana tɔw bali ka mɔgɔ minɛ

Pikiriw

Pikiri kɛrɛn­kɛrɛnnenw bɛ yen minnu bɛ se ka kɔnɔta bali. A ka c’a la, a pikiri bɛ kɛ kalo o kalo walima kalo 3 o kalo 3 dɔgɔtɔrɔso la, a ɲɛdɔnbaga dɔ fɛ. A pikiri fɔlɔ bɛ se ka kɛ ni kɛnɛya­baarakɛla ni muso ye a sɛgɛsɛgɛ ka a dɔn ko muso kɔnɔma tɛ. Pikiri bɛ se ka kɔnɔta bali ni a kɛra dɔrɔn kalolabɔ yeelen kɔ tile 5 kɔnɔ. Ni a kɛra tile 6 walima kalolabɔ daminɛnen kɔ ka mɛn, kafoɲɔgɔnw ka kan ka manani don walima ka dilanko to yen tile 7 nata kɔnɔ. Walasa ka kunnafoni caman sɔrɔ, aw bɛ sɛbɛn ɲɛ Bangekɔlɔsi pikiri lajɛ.

I n’a fɔ furakisɛni, porojɛsitin dɔrɔn bɛ bangekɔlɔsi pikiri dɔw la wa a dɔw la ɛsitorojɛni ni porojɛsitin fila bɛɛ bɛ u la. Muso minnu fari tɛ sɔn furakisɛni na, olu man kan ka pikiri fana kɛ (gafe ɲɛ Muso jumɛn man kan ka bangekɔlɔsi fura ta?). A ka ca a la, nin pikiri fila bɛɛ bɛ kɛ dɔgɔtɔrɔ dɔ fɛ. Nin pikiri ninnu tɛ mɔgɔ tanga dilannabanaw ma.

Pikiriw minnu faralen don ɲɔgɔn kan i n’a fɔ sikulofɛmu (Cyclofem) ani mesijina (Mesigyna), olu bɛ kɛ siɲɛ kelen kalo o kalo. Muso minnu fari tɛ sɔn ɛsitorojɛni na, olu ka kan ka u ye ka to yen (gafe ɲɛ Bangekɔlɔsi fura minnu faralen don ɲɔgɔn kan muso jumɛnw man kan ka olu ta?). Porojɛsitin dɔrɔn bɛ pikiri minnu na i n’a fɔ Depo Provera ani Noristerat, olu bɛ kɛ siɲɛ kelen kalo 2 o kalo 2 walima kalo 3 o kalo 3. Aw ye sɛbɛn ɲɛ Bangekɔlɔsi pikiri lajɛ.

Bangekɔlɔsiminɛn nɛgɛma walima a manaman

Bangekɔlɔsiminɛn nɛgɛma walima a manaman ye minɛn ye min bɛ don denso kɔnɔ a ɲɛdɔnbaga dɔgɔtɔrɔ walima tinminɛmuso dɔ fɛ. (A bɛ wele tubabukanna stérilet walima dispositif intra-utérin, wa D.I.U.). Porojɛsitin bɛ nin bangekɔlɔsiminɛnin na.

Bangekɔlɔsiminɛn nɛgɛma walima a manaman bɛ cɛ bali ka kɔnɔda muso la. Aw ye gafe ɲɛ Bangekɔlɔsi fɛɛrɛ min bɛ don bangenugu kɔnɔ (mununani), Le dispositif intra-utérin (DIU) lajɛ. Bangekɔlɔsiminɛn in bɛ se ka don waati bɛɛ ni muso ni a ka dɔgɔtɔrɔ dalen don a la ko muso kɔnɔma tɛ ani ko joli tɛ a ɲɛfɛla kɔnɔna na walima dilannabana. Muso bɛ se ka a ɲini kɛnɛya­baarakɛla dɔ fɛ walima tinminɛmuso ka bangekɔlɔsiminɛn in labɔ ni a b’a fɛ ka fɛɛrɛ wɛrɛ lajɛ walima ka kɔnɔta. Bangekɔlɔsiminɛn nɛgɛma walima a manaman tɛ mɔgɔ tanga dilannabanaw ma.

Muso minnu man kan ka bangekɔlɔsiminɛn nɛgɛma walima a manaman don:

• Kansɛri bɛ muso minnu musoya la. Sinna kansɛri bɛ muso minnu na, olu man kan ka bangekɔlɔsiminɛn in don, fo ni a kɛra a ziralama walima o ɲɔgɔn wɛrɛ.
• Sopisi ni leminanpo bɛ muso minnu na. Gafe ɲɛ Sopisi ni damajalan.
• Barakɔrɔdimi bɛ muso minnu na. Gafe ɲɛ Muso ka barakɔrɔladimi.

Lawakisɛfagalanw

Lawakisɛfagalanw ye: kangaji, furakisɛw ani muso bɛ tulu minnu kɛ a musoya kɔnɔ ka kɔn kafoɲɔgɔnya ɲɛ.

Lawakisɛfagalan bɛ cɛ lawakisɛw de faga sani u ka se muso denso kɔnɔ. Lawakisɛfagalan tɛ mɔgɔ tanga dilannabanaw walima sidabana ma. Furakisɛw ka kan ka don musoya kɔnɔ miniti 10 walima miniti 15 ka kɔn kafoɲɔgɔnya ɲɛ. Kangaji walima tuluni bɛ mako ɲɛ ni u kɛra sanga surunni ka kɔn dilanko ɲɛ. Lawakisɛfagalan ka kan ka don musoya la waati o waati ni aw bɛna kafoɲɔgɔnya kɛ. Kafoɲɔgɔnya kɔfɛ, aw kana lawakisɛfagalan ko ka bɔ aw la ka kɔn lɛrɛ 6 ɲɛ. Lawakisɛfagalan dɔw bɛ ŋɛɲɛ bila musoya kɔnɔna na walima ka a jenijeni.

Ale kelen tɛ mako ɲɛ, nka ni a faralen don fugulan nafama walima falakani kan, o bɛ kɔnɔta balili sinsin. Lawakisɛfagalan tulu tɛ mɔgɔ tanga dilannabanaw ni sida ma. Ni aw bɛ ale kan ka caya, a laban bɛ ŋɛɲɛ bila musoya kɔnɔna na, min bɛ kɛ sababu ye musoyabana dɔ ka a tigi minɛ, hali sida bɛ o la.

Manani falakalama

Ale bɛ don musoya kɔnɔ. A bɛ se ka don waati bɛɛ ka a bila fo lɛrɛ 6 kafoɲɔgɔnya kɔfɛ. Falakani bɛ denso datugu walasa cɛ lawaji kana taa kɔnɔ ka kɛ kɔnɔ ye.

Falakaniw bonya bɔ ɲɔgɔn ɲɛ. A ɲɛdɔnbaga dɔgɔtɔrɔ bɛ se ka muso bɛɛ bɛrɛmata fo a ye.

Kafoɲɔgɔnya kɔfɛ, manani in bɛ se ka ko ni ji ni safinɛ ye ka tila ka bila ka ja. A ka kan ka mara yɔrɔ sanuman na, sumaya tɛ yɔrɔ min na.

Manani falakalama bɛ se ka san 2 kɛ. Aw bɛ to ka a lajɛ yeelen na ni wo tɛ a la. Hali ni wo fitini bɛ a la, aw bɛ o fili ka kura dɔ ta.

Manani falakalama bɛ se ka mɔgɔ tanga dilannabanaw ma, ani fana ni lawakisɛfagalan kɛra a la (aw ye o lajɛ sanfɛ), a bɛ muso tanga kɔnɔtali ma.

📖 Gafe kɔnɔkow
← Segin kɔfɛ | Taa ɲɛfɛ →