Sigida 18 Ɲɛgɛnɛsiraw ani mɔgɔ dogoyɔrɔw

Muso ka banaw

Nɔgɔji jɛman bɔ (ji salasala walima nɛ min bɛ bɔ musoya fɛ)

Nɔgɔji jɛman dɔɔni bɔli tɛ basi ye. Nka ni a ye musoya yɔrɔ dɔw bilen ani ka ŋɛɲɛ bila a la, a kasa ka go, o ye bana taamasiɲɛ ye.

Nɔgɔji jɛman bɛ bɔ muso caman na ani musoya bɛ u ŋɛɲɛ, kɛrɛnkɛrɛnnenya na kɔnɔmaya waati. O ji labɔ sababu ye bana suguya camanw ye a ka ca a la minnu man jugu. O la, ni sopisi walima damajalan don, o bɛ se ka fiɲɛ bila den na a bange waati (sɛbɛn ɲɛ Denyɛrɛni ka ɲɛdimi lajɛ).

1. Nɔgɔji jɛman min ɲɛ ye binkɛnɛ ni nɛrɛ ɲagaminen walima bugurijɛlama ye, a ka ca a la, a bɛ kanga, a kasa man di, ŋɛɲɛ bɛ a sen kɔrɔ.

A bɛ se ka kɛ bana don min sababu ye tumu ye (la trichomonase). Mɔgɔ dogoyɔrɔw bɛ a jeni jeni, u bɛ funu ni ka dimi. Joli bɛ se ka ye nɔgɔji la.

A furakɛcogo:

A nafa ka bon aw ka to ka aw dogoyɔrɔw saniya.
Ka winɛgiriji kɛ ji wɔlɔkɔlen na ka musoya ko ni o ye, o ka ɲi aw ma. Ni aw ma winɛgiri sɔrɔ, aw bɛ lenburukumuni bisi ka kɛ ji la.

Aw bɛ Kutu fitini ɲɛ 3 winɛgiri jɛman kɛ ji wɔlɔkɔlen litiri kelen na.

Kunnafoni nafama: Aw bɛ a to ji ka don dɔɔni dɔɔni fo miniti 3. Aw kana sugunɛkɛjuru don musoya kɔnɔ ka tɛmɛ santimɛtiri 8 kan.

Aw ye aw hakili to nin na: aw kana musoya ko kɔnɔmaya dɔgɔkun 4 laban kɔnɔ walima dɔgɔkun 6 jiginni kɔ. Ni aw bɛ tɔɔrɔ nɔgɔjijɛmanbɔ in sen fɛ, aw bɛ nisitatinikisɛ (nystatin) don musoya la (aw ye nimero 2 lajɛ dugumafɛ).

Aw bɛ se ka layi kisɛ kelen don musoya la:

Aw bɛ layi wɔrɔ, aw bɛ a kɔlɔsi a kana npɛrɛn. aw bɛ a meleke fini jɛlen dɔ la ka sɔrɔ ka don musoya kɔnɔ.
Aw bɛ musoya ko siɲɛ fila tile kɔnɔ, aw bɛ layi dɔ don o cogo la su o su tile 10 fo ka se 14 ma.
Ni o ma a nɔgɔya, aw bɛ musoyafura dɔ ta metoronidazɔli (métronidazole) bɛ min na walima fura wɛrɛ min kofɔra tumumisɛnniw na, walima aw bɛ metoronidazɔli furakisɛ ta. Walasa ka yɛrɛ kɔlɔsicogo ni fura in tacogo dɔn, sɛbɛn ɲɛ Metoronidazɔli, Métronidazole lajɛ.

Kunnafoni nafama: Walasa ka muso ka dogoyɔrɔbana furakɛ ka a ban, a cɛ fana ka kan ka a yɛrɛ furakɛ, o cogo kelen na ni a bɛ cɛ la, muso fana ka kan ka a yɛrɛ furakɛ. Ka da a kan a bɛ se ka kɛ bana in bɛ cɛ ɲɛgɛnɛbɔsira la hali ni o ye a sɔrɔ dimi tɛ a kan (cɛ dɔw bɛ yen ni tumumisɛnni bɛ u la, ni u bɛ ɲɛgɛnɛkɛ, a bɛ u jeni jeni).

2. Nɔgɔjijɛman min bɛ i n’a fɔ nɔnɔkumu ni a kasa bɛ i ko bugun kasa

Nin bana in bɛ se ka sɔrɔ surukusigilan fɛ. A ŋɛɲɛ bɛ se ka bonya. Bana in bɛ kɛ musokɔnɔma musoya dawolofitiniw na, sukarodunbana bɛ muso min na, sidatɔw, muso minnu bɛka banakisɛfagalan ta walima bangekɔlɔsifurakisɛ.

A furakɛcogo: Aw bɛ musoya ko ni winɛgiri ni ji ye (a lajɛ sanfɛ) walima furabilenni, violet de gentiane. Walima aw bɛ furakisɛ ninnu dɔ la kelen dɔn musoya la: nisitatini, nystatine, mikonazɔli, miconazole, walima kulotirimozɔli, clotrimazole. Ka fɛnɛ sukarontan dɔ kɛ musoya kɔnɔ, a bɛ fɔ ko o ye musoyalabana farafinfura kɛcogo ɲuman dɔ ye. Aw kana banakisɛfagalan ta abada nin bana suguya ninnu kɛlɛli la sabula bana in tɛ banakisɛbana ye, bugunbana de don. O bɛ se ka bana juguya.

3. Nɔgɔji jɛman i n’a fɔ nɔnɔ, ni kasa gɛlɛn bɛ a la.

O bɛ se ka kɛ banakisɛw nɔ ye.

Aw bɛ musoya ko ni winɛgiriji ye walima powidɔni-iyode (povidone-iodine), teminkutu ɲɛ 6 kɛ ji litiri 1 na. Ani fana, aw bɛ se ka a lajɛ ka layi fɛrɛn dɔ don musoya la su o su dɔgɔkun 2 kɔnɔ. Ni nin furakɛlicogo fila ma fɛn ɲɛ, aw bɛ metoronidazɔli, métronidazole fana lajɛ.

4. Nɔgɔji jɛman ɲɛ kɛlen sikɔlɔma ye, a jilama bukurijɛlama, ni joli, a kasa man di, dimi bɛ kɛ a tigi barakɔrɔla la.

Olu ye musoyalabana jugumanba taamasiɲɛ ye, walima a bɛ se ka kɛ kansɛribana yɛrɛ ye. Ni farigan bɛ a sen kɔrɔ, aw bɛ se ka banakisɛfagalan ta (ni aw bɛ se, aw bɛ ampisilini, ampicilline ni tetarasikilini, tétracycline ta ɲɔgɔn fɛ. Wa aw kana sigi ni a ye, aw bɛ taa dɔgɔtɔrɔso la joona joona.

Kunnafoni nafama: Nɔgɔjijɛmanbɔ kɛra a suguya o suguya ye, ni a mɛnna aw la ko fura ma fɛn ɲɛ a la, aw bɛ taa dɔgɔtɔrɔ so la.

Musow bɛ se ka u yɛrɛ tanga musoyalabana caman ninnu ma cogo min na

Ka u janto u musoya saniyali la. Ni aw bɛ se, aw bɛ a ko ni safinɛ ye ka a jɛ don o don. Aw kana safinɛ don musoya kɔnɔ barisa a ka farin.
Ka ɲɛgɛnɛ kɛ ni aw tilala kafoɲɔgɔnya la, o bɛ aw kisi bana ma nka a tɛ aw bali ka kɔnɔ ta.
Ni aw tilala banakɔtaa la, aw bɛ o yɔrɔ ko ka a jɛ walima ka a jɔsi. Ni aw bɛ aw kɔ jɔsi, aw bɛ a kɛ ka taa ni kɔfɛla ye, o bɛ a to nɔgɔ tɛ se ɲɛfɛla ma. Ni aw ye a jɔsi ka na ɲɛfɛ banakisɛ ni tumumisɛnniw bɛ se ka don musoya kɔnɔ. Aw ka kan ka musomaniw fana dege a kɛcogo la.

Muso ka barakɔrɔladimi

Kun caman bɛ a la, olu ɲɛfɔlen don gafe in yɔrɔ caman na. Kumakan nataw la ɲininkali ɲɛnɛma damadɔw bɛ yen minnu bɛ aw dɛmɛ ka dimi yɔrɔ dɔn.

Kolikɔnɔdimi (sɛbɛn ɲɛ Muso ka kalolabɔ) bɛ juguya sani koli ka daminɛ walima a bannen kɔfɛ wa?
Ɲɛgɛnɛbaralabana (sɛbɛn ɲɛ Ɲɛgɛnɛsiralabana minnu tɛ sɔrɔ cɛ ni musoya fɛ; ni u tɛ yɛlɛma mɔgɔ fɛ), o ye barakɔrɔladimi kunba dɔ ye. Aw bɛ ɲɛgɛnɛ kɛ ka caya wa? Dimi bɛ a la wa?
Tɔkɔkolodimi. Tuma dɔw la o ye sopisi walima damajalan yɛlɛmabolo laban ye. A bɛ farigan bila mɔgɔ la ani ka dimi kɛ barakɔrɔla la. Tɔkɔkolodimi bɛ se ka sɔrɔ fana bange, kɔnɔtiɲɛ kɔfɛ walima bangekɔlɔsi fɛɛrɛ dɔ bɛ yen ni a bɛ wele ko mununani (DUI) ni o donna denso kɔnɔ o fana bɛ se ka na ni tɔkɔkolodimi ye. O la aw bɛ sopisi ni damajalan furakɛ, ka fara o kan, fura minnu kofɔlen don sɛbɛn ɲɛ Damajalan ni npɔrɔn furaw na, aw bɛ olu di a tigi ma ani fana metoronidazɔli (Métronidazole) miligaramu 500 tile 14 kɔnɔ. Ni o ye a sɔrɔ muso kɛlen don ka mununani (DUI) don, aw ka kan ka o labɔ.
Ni aw ye a jateminɛ ko fɛn bɛka kɛ aw barakɔrɔla la min ma aw diya, a ɲɛfɔlen don ka ɲɛ sɛbɛn ɲɛ Kɔnɔbarala kansɛri taamasiɲɛw la. Lala a bɛ se ka kɛ fankisɛ kuru ye walima kansɛribana, o kama, aw ka kan ka taa dɔgɔtɔrɔso la joona joona.
Den dali denso kɔkan (ni den bɛka kunbaya denso kɔkan sɛbɛn ɲɛ Den dalen denso kɔ kan). A ka ca a la, o bɛ kɔnɔdimi gɛlɛn ni basibɔn bila musokɔnɔma na. Tuma dɔw kɔnɔtajoona taamasiɲɛw bɛ kɛ muso la (aw ye sɛbɛn ɲɛ Kɔnɔmaya taamasiɲɛw), ka fara ɲanamini ni fanga dɔgɔya kan. Ni nin taamasiɲɛw ninnu kɛra muso la dɔrɔn, aw bɛ taa ni a ye dɔgɔtɔrɔso la joona joona ka a sababu kɛ a ni bɛ se ka to a la.
Kɔnɔtiɲɛ gɛlɛyaw (sɛbɛn ɲɛ Kɔnɔtiɲɛ laɲininen). A bɛ se ka farigan, basi jolikurulama bɔli, barakɔrɔladimi, ɲɛgɛnɛkɛ gɛlɛya ni dusukasi bila muso la. O la aw bɛ banakisɛfagalanw di a ma, i n’a fɔ aw bɛ minnu di jibaatɔfarigan na (sɛbɛn ɲɛ Jiginni kɔfɛ banaw). Walasa ka muso ni kisi, aw bɛ taa ni a ye dɔgɔtɔrɔso la o yɔrɔnin bɛɛ
Bana, tɔɔrɔya wɛrɛ nugu la walima nugubakun na. O dimi bɛ sɔrɔ dumunikɛcogo fɛ wa?, walima nugu yɛlɛmayɛlɛmacogo wa? (sɛbɛn ɲɛ Tɔgɔtɔgɔninbanakisɛ, Amibes).

Gɛlɛya kofɔlen ninnu na, damadɔw bɛ yen minnu farati man bon.

Nka dɔw bɛ a la olu ka jugu kosɛbɛ. A man nɔgɔn tuma bɛɛ ka i da se dɔ ma ka dɔ to. sɛgɛsɛgɛli kɛrɛnkɛrɛnnenw de nafa ka bon a ko la.

Ni sigasiga bɛ aw la dimi sababu la, walima ni nɔgɔya tɛka don bana na teliya la, aw ka kan ka taa dɔgɔtɔrɔso la.

📖 Gafe kɔnɔkow
← Segin kɔfɛ | Taa ɲɛfɛ →