Cɛya la
Sigida 18 Ɲɛgɛnɛsiraw ani mɔgɔ dogoyɔrɔw
Cɛya la
Musoya la
Ni joli bɛ dogoyɔrɔ la, a tɛ mɔgɔ dimi, o bɛ se ka kɛ npɔrɔn taamasiɲɛ ye (aw ye sɛbɛn ɲɛ Dana lajɛ). Joli caman wɛrɛw bɛ se ka dilannabanaw taamasiɲɛ jira: dogoyɔrɔla gorow, jolimisɛnniw walima kurukuruw. Sidabana bɛ se ka sɔrɔ o joliw fɛ kafoɲɔgɔnya senfɛ. Aw ye fugulan nafama matarafa kafoɲɔgɔnya waati la, nka ni fugulan ma se ka joli datugu, aw bɛ aw yɛrɛ minɛ.
Goro ninnu bɛ sɔrɔ banakisɛw fɛ minnu bɛ jɛnsɛn kafoɲɔgɔnya waati. O gorow ni fari fan tɔw ta bɛɛ ye suguya kelen ye (aw ye sɛbɛn ɲɛ Goroniw lajɛ) nka dogoyɔrɔla gorow ka ca ka tɛmɛ olu kan.
A kurukuruw ka misɛn, u ɲɛ bɛ kɛ jɛman walima sikɔlɔma ye ka a yɔrɔ kuru ka a ja. Cɛw ta bɛ bɔ u cɛya la walima banakɔtaa yɔrɔ la. Ni muso don, a bɛ bɔ musoya dawolow la, a kɔnɔna na, wolonugu la walima banakɔtaa kɛrɛdaw la.
Aw bɛ tirikuloro-asetiki, trichloroacétique walima podofilini, podophylline dɔɔni mu goro bɛɛ kelen kelen na (ni aw bɛ se, aw bɛ fɔlɔ ka jolituluni walima tulu wɛrɛ mu a lamini na walasa ka wolo fan tɔw tanga bana in ma. Aw bɛ a yɔrɔ ko walasa podofilini ka bɔ a la ni lɛri 6 kɔfɛ. Tuma dɔw la, a furakɛli bɛ se ka mɛn senna. Goro ninnu bɛ dɔgɔya ka tunu, nka a dɔw la a bɛ segin kɔ.
Ni goro bɛ cɛ la walima a kafoɲɔgɔn na, cɛ ka kan ka fugulan nafama don kafoɲɔgɔnya waati (aw ye gafe Mananiw (fugulan nafama) lajɛ).
Fugulan nafama donni kafoɲɔgɔnya waati, o bɛ mɔgɔw tanga bana caman ma i n’a fɔ goro, jolimisɛnniw, kurukuru, sidabanakisɛ ani dilannabana wɛrɛw.
Cɛ la
Muso la
O jolimisɛnni jugumanw bɛ bɔ wolo la ka a sababu kɛ banakisɛ dɔ ye. Kisɛkisɛni bɛ bɔ dogoyɔrɔw la. Bana bɛ yɛlɛma mɔgɔ la kafoɲɔgɔnya waati. A bɛ se ka bɔ mɔgɔ da la ni a tigi ye a da don a kafoɲɔgɔn dogoyɔrɔ la. Kisɛkisɛni dɔ bɛ bɔ mɔgɔ la minnu ni goro tɛ suguya kelen ye, olu bɛ sɔrɔ sufɛfarigan fɛ (aw ye sufɛfarigan yɔrɔ lajɛ, sɛbɛn ɲɛ Sufɛfarigan).
Nin kurukuru kofɔlenw bɛ se ka dɔgɔkun 3 kɛ mɔgɔ la. U bɛ farigan ni gɛnɛgɛnɛ bila mɔgɔ la. Ni muso bɛ sugunɛkɛ, a yɔrɔ bɛ a jenijeni.
Banakisɛ bɛ se ka to fari la hali bana taamasiɲɛw tununen kɔ. Kurukuru wɛrɛw bɛ se ka bɔ dɔgɔkun caman walima san caman bana minɛnen kɔ. A ka ca a la, joliw bɛ bɔ a yɔrɔ kɔrɔw la nka u dimi man bon, u man ca wa u kɛnɛya ka di.
Fura tɛ yen min bɛ dogoyɔrɔla goro kɛnɛya, asikulowiri, acyclovir bɛ se ka a mada. Aw bɛ a yɔrɔ saniyalen to tuma bɛɛ. Aw bɛ kafoɲɔgɔnya ye ka a to yen sani joliw ka kɛnɛya hali ni o ye a sɔrɔ manani bɛ aw bolokɔrɔ.
Ni aw magara joli ninnu na waati o waati, aw bɛ aw tɛgɛ ko ni safinɛ ye. Aw bɛ aw jija aw bolow kana se aw ɲɛ ma. Ni goro bɔra mɔgɔ ɲɛ na, o bɛ se ka laban fiyentɔya ma.
Aw ye aw janto nin na: Ni goro bɛ musokɔnɔma na, a bɛ se ka a yɛlɛma a den fɛ jiginni waati. O ye faratiba ye den ma. Aw bɛ aw ka dɔgɔtɔrɔ walima tinminɛmuso ladɔnniya ko goro tun bɛ aw la waati dɔ.
Cɛ la
Muso la