Sigida 1 Farafinfuraw kɛli
A’ ye nin taabolow ni nin hakilinaw jumɛnw mɛn walima ka u ye a’ ka sigida la? A ka ca a la, olu ɲɔgɔnna wɛrɛw bɛ a’ ka sigida la. A’ ye aw hakili jakabɔ u sɔrɔcogo kan a’ ka sigida la, lala a dɔw ka ɲi furakɛli sira kan nka a dɔw tɛ mako ɲɛ walima a dɔw fana bɛ kɛnɛya nagasi.
| Dabali jugu kɛlaw ni subagaw fagali bɛ se k’u ka mɔgɔ bananenw kɛnɛya wa? | Ayi! O tɛ se k’u kɛnɛya! A tɛ bɛn mɔgɔ ka kojugu kɛ i mɔgɔ ɲɔgɔn na |
| Yala birifini ka kan ka biri fariganbagatɔ la wa? (misali la, ɲɔni bɛ mɔgɔ min na) | Ayi! O man kan! Ni farigan bɛ mɔgɔ la, an ka kan k’a kannankolon bila walasa dɔ ka bɔ fari kalaya la (a’ ye sɛbɛn ɲɛ Farigan lajɛ). |
| Tiɲɛ don ko banabagatɔ man kan ka ko wa? (misali la ɲɔni bɛ denmisɛn min na). | Ayi! O tɛ tiɲɛ ye! Banabagatɔ bɛɛ ka kan ka ko don o don hali ɲɔni bɛ denmisɛn minnu na. |
| Yala tiɲɛ don ko shɛfan dunni bɛ se ka den kɛ dagaran ye walima son? | Ayi dɛ! Shɛfan dunni yɛrɛ de ka ɲi den ma kosɛbɛ. Den mako bɛ witamini minnu na, olu caman bɛ sɔrɔ shɛfan na. |
| Tiɲɛ don ko sukaroma fɛnw dunni bɛ kɔnɔnatumu bila denmisɛnw na wa? | Kɔnɔnatumuw tɛ sɔrɔ sukaroma fɛnw fɛ, u bɛ sɔrɔ saniya matarafa baliya de fɛ. Nka tiɲɛ don ko sukaroma fɛnw dunni bɛ se ka sumu bila denmisɛnw na ani k’u nugu siri. |
| Tiɲɛ don ko dumuni suguya dɔw bɛ sumaya bila mɔgɔ la wa? | Ayi dɛ! Banakisɛ dɔ de bɛ a bila mɔgɔ la, o bɛ sɔrɔ soso musoman kinni fɛ. Sababu jɔnjɔn min bɛ mɔgɔ kisi sumaya ma, o ye ka sangekɔrɔsili matarafa ani ka sosow bali buguli la i ka sigida la (sɛbɛn ɲɛ Sosow kunbɛncogo sigida la). |
| A ka ɲi mɔgɔ wɔsilen k’i ko wa? | Ɔwɔ! Basi t’o la. Nga i b’a to i kɔnɔtiɲɛ ji ka ja fɔlɔ. Ni mɔgɔ y’a ko san’a k’a da, O b’a saniya k’a tanga bana jugu caman ma. |
| Tile joli jiginni kɔfɛ, muso bɛ se k’a ko? | Muso bɛ se k’a ko a jiginnen dugusajɛ bɛɛ, nga a ka kan k’a ko ji wɔlɔkɔlen na. Lada la ko jibaatɔ ka kan ka dɔgɔkun caman kɛ ka a sɔrɔ a ma ko. O kobaliya bɛ se ka banaw lase muso ma. |
| Tiɲɛ don ni: “jakuma ye kalo minɛ”, n’o kalojɛ sigira muso kɔnɔma kan, k’o de bɛ dawoloɲimibana bila a den na wa? | Ayi! Tiɲɛ tɛ. Ni dawoloɲimi bana bɛ den na, i b’a sɔrɔ a ba tun tɛ kɔkɔwasa dun walima kun wɛrɛw bɛ se ka sɔrɔ a la. |
| Jibaatɔ man kan ka dumunifɛn jumɛnw dun? | Jibaatɔ ka kan ka dumunifɛn bɛɛ dun i n’a fɔ nakɔfɛnw, jiridenw, sogo, nɔnɔ, shɔ ani fɛn caman wɛrɛw. |
| Ko lenburuba ni buyaki ani jiriden wɛrɛw dunni bɛ mura ni farigan juguya wa? | Ayi dɛ, ni mura b’i la walima farigan, a ka ɲi ka jiriden dun ani ka jiridennɔnɔw min. |
| Ko ni musokɔnɔma taamana sagawolo kan, o b’a to a denw tɛ fari sɔrɔ wa? | Ayi, o tɛ tiɲɛ ye. Den mako bɛ dumuni nafama minnu na, ba tun t’olu de sɔrɔ. |