Sigida 10 Furakɛli kunfɔlɔ

Kungolo joginni

Ni mɔgɔ dɔ bɔra ka bin, walima fɛn dɔ ye a gosi a kun na, walima a yɛrɛ ye sirabakankasara sɔrɔ, aw bɛ kunsɛmɛ joginni taamasiɲɛw ɲini. Ni o ye a sɔrɔ ko a tigi ye dɔlɔminna walima dɔrɔgutala ye, a kunsɛmɛ joginni dɔnni bɛ gɛlɛya barisa a kɛcogo ni dɔlɔminna ni dɔrɔgutala kɛcogow bɔlen don ɲɔgɔn fɛ. Fana, aw bɛ a tigi kan ni a kɔkolo lajɛ (sɛbɛn ɲɛ Kɔkolo ni kan joginw) ni joginda bɛ u la barisa olu fila bɛ taa ɲɔgɔn fɛ.

Kunsɛmɛ joginni min man jugu kosɛbɛ, o taamasiɲɛw

A tigi ka kan ka a lafiɲɛ fo lɛri 24 ani ka dimimadafura ta i n’a fɔ parasetamɔli (paracétamol) walima asetaminofɛni (acetaminophène), nka aw kana ibiporofɛni (ibuprofène) walima asipirini (aspirine) di a tigi ma barisa olu bɛ se ka dɔ fara joli jiginni kan kunsɛmɛ na. Aw bɛ aw janto a tigi la lɛri 24 kɔnɔ. Ni a tigi bɛ sunɔgɔ la, aw bɛ to ka a lakunu tuma ni tuma ka a lajɛ ni a bɛ se ka aw ka ɲininkaliw jaabi walima ni a bɛ a yɛrɛ kalama. Mɔgɔ joginnen kɔ, ni aw ye a kɔlɔsi ko a tigi tɛka kɛ a yɛrɛ kalama, kungolodimi ye a minɛ min bɛka juguya ka taa a fɛ walima a bɛ kirin ani ka to ka ja, o bɛ a jira ko joli jiginna kunsɛmɛ na, O la aw bɛ aw teliya ka taa ni a ye dɔgɔtɔrɔso la.

Kunsɛmɛ joginni jugumanba taamasiɲɛw

Ni aw ye nin taamasiɲɛw dɔla kelen kɔlɔsi mɔgɔ la, aw bɛ taa ni a ye dɔgɔtɔrɔso la.

O taamasiɲɛw bɛ daminɛ lɛri damadɔw mɔgɔ joginnen kɔfɛ.

image

Basi bɛ bɔ kungolo la

image

Basi caman bɛ bɔ kungololajoginni na. Ni aw bɛ a dɔn ko a tigi kɔkolo ma jogin, aw bɛ a ɲini a fɛ a ka wuli ka jɔ, walima aw bɛ a wuli ka jɔ walasa jolibɔn ka nɔgɔya. Aw bɛ a yɔrɔ digidigi walasa jolibɔn ka jɔ, o kɔ aw bɛ yɔrɔ joginnen ko ka jɛ ka sɔrɔ ka a kala walima ka kɔli nɔrɔ a la. Ni minɛn tɛ aw bolo aw bɛ joli lajɔ ni min ye, aw bɛ a tigi kunsigi siri joginda da la i n’a fɔ aw ɲɛ bɛ ja la cogo min.

Ni a joli dayɛlɛlen don, aw bɛ a lajɛ ni kun kolo yɔrɔ dɔ pɛrɛnnen don. Ni aw ye a dɔn ko kun kolo yɔrɔ dɔ dayɛlɛlen don, aw bɛ datugucogo ɲini a la, nka aw kana aw tintin yɔrɔ joginnen kan.

📖 Gafe kɔnɔkow
← Segin kɔfɛ | Taa ɲɛfɛ →