Aw man kan ka sɔn fura minnu pikiri la abada, olu de filɛ:
Furakisɛ de ka fisa ni pikiri ye
Witaminiw. Witaminiw pikirilama man teli ka baara kɛ ka tɛmɛ a kunutaw kan. Pikiriw da ka gɛlɛn wa u farati ka bon. Aw ye witamini furakisɛmaw ni a furajimaw ta. Olu ka ɲi ni pikiriw ye, walima aw ka dumuni ɲumanw dun, a dɔ la aw mako tɛna jɔ witaminiw tali la.
Biɲɛji, jɛgɛji, witamini B12, ani jolisegin pikiri. Aw kana ninnu pikiri kɛ abada. Joliseginfura (sulfate ferreux) tali de nafa ka bon.
Kolosinsinfura (le calcium). Kolosinsinfura pikiri kɛli jolisira fɛ, o ye farati belebele ye ni a ji ma lataa jolisira fɛ dɔɔni dɔɔni. A pikiri kɛli bobara la, o bɛ se ka nɛ ta. Wulakɔnɔmɔgɔ man a kan ka sɔn mɔgɔ ka kolosinsinfura pikiri kɛ u la ka u to wula kɔnɔ.
Penisilini, Pénicilline). A ka ca a, la bana o bana bɛ furakɛ ni penisilini pikiri ye, fura dunta bɛ se ka kɛ ka o bana furakɛ. A farati ka bon ka penisilini pikiri kɛ jolisira fɛ. Aw bɛ se ka penisilini pikiri kɛ bana na, min ka jugu.
Penisilini ni sitɛrɛpitɔmisini ɲagaminen (Pénicilline avec stréptomycine). Aw kana girin ka sɔn ni fura ɲagaminen na. Aw kana fura kofɔlen ninnu kɛ ka mura walima murafarigan furakɛ barisa a tɛ mako ɲɛ o banaw furakɛli la. Fura kofɔlen ninnu bɛ se ka gɛlɛya wɛrɛw lase aw ma; ka banabagatɔ tulo geren tuma dɔw la walima ka a faga. Fura ninnu ta ko jugu o bɛ sɔgɔsɔgɔninjɛ ni banajugu wɛrɛw kɛnɛyali gɛlɛya.
Kuloranfenikɔli (chloramphénicol) walima tetarasikilini (tétracycline). Nin fura kofɔlen ninnu dunta ka ɲi kosɛbɛ. Fura ninnu kisɛ tali ni u furaji mini ka fisa ni u pikiri ye.
Sɔrɔmu (le sérum). Sababuw ka dɔgɔn minnu bɛ a jira ko sɔrɔmu ka ka kan kɛ banabagatɔ la, kɛrɛnkɛrɛnnenya la dugumisɛnw kɔnɔ, ka da a kan pikiri dɔw ka teli ka banabagatɔ faga. Aw kana sɔn sɔrɔmu ma, fo ka a bɔ kunfilanitu juguman furakɛli la; hali o bɛɛ la, kɛnɛyajiw ka ɲi wa u farati man bon.
Fura (pikiri) minnu bɛ kɛ jolisira fɛ. Jolisiralapikiri farati ka bon, o kama dɔgɔtɔrɔ dɔrɔn de bɛ se ka a kɛ ka ɲɛ. Aw kana pikiri kɛ bobara la abada. O fana kɛli a ɲɛjugu kan, o ka jugu ni a tɔ bɛɛ ye. Jolisiralafuraw ka kan kɛ ni farilajidɛsɛ bɛ banabagatɔ la, wa pikiri ɲɛdɔnbagaw de ka kan ka a kɛ.
