Faratiw ni yɛrɛ tangacogow

Joli nɛma i n’a fɔ nin ɲɔgɔn, o ye pikiri biɲɛ tobobali ka sɔgɔlida nɔ ye, ka da a kan a banakisɛw ma faga.

Farati minnu bɛ pikiri la: 1) o ye, banakisɛ sɔrɔli ye pikirida fɛ. 2) degun dɔw, walima fura kɔlɔlɔw.

Bana min sɔrɔla pikiribiɲɛ donda fɛ. Nɛn donni farikolo la, banakisɛ jɛnsɛnni fari la hali nɛgɛtigɛbana, olu bɛɛ bɛ se ka sɔrɔ pikiri kɛcogo jugu fɛ. nɛgɛtigɛbana min sababu bɔra pikiri la, o farati ka bon ka tɛmɛ joginda ta kan. Sidabana bɛ sɔrɔ minnɛn fɛ, minɛn min donna sidatɔ dɔ joli la.

Ni aw ye pikiri kɛ ni biɲɛ ye, aw bɛ aw hakili to a saniyali la. A ka kan aw ka pikiribiɲɛ saniya fɔlɔ, sani aw ka pikiri kɛ ni a ye. pikiribiɲɛ tobilen kɔfɛ aw kana a to aw bolo ka maga a la kuma tɛ fɛn wɛrɛ ma.

Biɲɛ min kɛra ka pikiri kɛ ka tɛmɛ, aw kana o biɲɛ kelen kɛ ka pikiri kɛ mɔgɔ wɛrɛ la, ka a sɔrɔ aw ma a tobi. Aw ye bilasiralikanw bato ka ɲɛ (aw ye gafe ɲɛ nataw lajɛ).

Aw bɛ aw tɛgɛw saniya ka ɲɛ sani aw ka pikiri labɛn walima ka pikiri kɛ

Lɛri damadama walima tile damadama pikiri kɛlen kɔfɛ, banabagatɔ fari bɛ se ka bilen bilen ani ka a ŋɛɲɛ. Ni aw seginna ka o fura kelen kɛ a tigi la, a bɛ se ka sa (aw ye gafe ɲɛ Faritanabanaw lajɛ).

A ka fisa aw ka a ɲini ka furaw sidɔn ani ka yɛrɛkɔlɔsi fɛɛrɛw labato sani aw ka pikiri kɛ.

Ni gɛlɛya wɛrɛw sɔrɔla fura minnnu tali sababu la, aw kana o fura kelen kɛ o banabagatɔ kelen na tuguni

• Fari bilen bilenni ka ŋɛɲɛ kɛ a senkɔrɔ
• fari funufununi degunw, (aw ye sigida Faritanabanaw lajɛ)
• Ninakilidegun
• Kirinni taamasiɲɛw
• ɲɛnamini ni dusukunɲugun (fɔɔnɔ nege)
• dibi donnni ɲɛ kɔrɔ
• mankan tulo kɔrɔ walima tulogeren yɛrɛ
• kɔmɔkilidimi
• sugunɛkɛ gɛlɛya

Pikiri biɲɛ saniya bali kɛra ka pikiri kɛ nin den in na (a banakisɛw tun ma faga ka ban pewu)

Pikiribiɲɛ saniyabali ye joli jugumanba bila den na fo ka nɛ sigi a kɔnɔ. A laban na nɛnmanyɔrɔ dayɛlɛ la, o de jiralen filɛ ja in na.

U ye pikiri kɛ den in na ko mura tun bɛ a la. A tun bɛ fisaya ni fura foyi yɛrɛ tun ma di den ma. Sani fura ka den in kɛnɛya, a kɛra a ma sababujugu ye.

Aw ye aw janto nin na: ni aw bɛ se, ni aw bɛ denw furakɛ, aw bɛ a kɛ fura duntaw ye, aw kana pikiri kɛ u la abada.

Aw bɛ pikiri kɛ ni o ye a sɔrɔ a ɲɛci bɛ yen.

Walasa ka nin degun ninnu bali:

• Aw bɛ pikirijikɛlan ni pikiri biɲɛ tobi sani aw ka fura kɛ a kɔnɔ, aw bɛ aw kɔlɔsi kosɛbɛ u saniyalen ka to.
• Pikiri bɛ kɛ fari yɔrɔ min na, aw bɛ o yɔrɔ saniya ni banakisɛ­fagalan ye, sani aw ka pikiri kɛ
• Aw kana fura di banabagatɔ ma ka tɛmɛ fura kofɔlen kan, aw ka da a la fana ko a ka ɲi ani a ta waati ma tɛmɛ.
• Aw ye pikiri kɛ a kɛ yɔrɔɲuman na. Aw kana pikiri kɛ denw ni denmisɛn fitiniw bobara la. Aw bɛ u ka pikiri kɛ u woro kɛnɛmayanfan sanfɛla la. (aw ye a dɔn ko ni pikiri kɛra den bobara la siɲɛ caman, a bɛ fiɲɛ bila fasaba la.

📖 Gafe kɔnɔkow
← Segin kɔfɛ | Taa ɲɛfɛ →