Aw bɛ taa ni banabagatɔ ye dɔgɔtɔrɔso la min ka surun aw la. Banajugu dɔw bɛ yen aw ka kan ka dɔgɔtɔrɔ dɔ ka dɛmɛ ɲini olu la joona. Ni dɔgɔtɔrɔ mɛnna a ma na, walima ni aw ma se ka taa ni banabagatɔ ye dɔgɔtɔrɔso la, a ni fura min ka kan aw bɛ o kɛ a la sani dɔgɔtɔrɔ ka se aw ma. Walasa ka fura kɛta hakɛ dɔn, aw bɛ fura in kunnafonisɛbɛn kalan, a sanna ni min ye. Sani aw ka pikiri kɛ, aw b’a ɲini ka fura in kɔlɔlɔw dɔn ani ka u kunbɛn (aw ye sigida 25 lajɛ, Gafe in kɔnɔ fura kofɔlenw tacogo).
Bana basigilen minnu filɛ, olu bɛ furakɛ tuma dɔw la ni pikiri ye, nka o fana tɛ kɔrɔtɔ ko ye, a nafa ka bon aw ka dɔgɔtɔrɔ dɔ ka dɛmɛ ɲini. O banaw filɛ:
Pikiri MAN KAN KA kɛ fewu kun min na:
Ni aw bɛ se ka dɔgɔtɔrɔ ka dɛmɛ sɔrɔ joona, aw kana pikiri kɛ abada.
Bana min ma juguya ka dantɛmɛ, aw kana pikiri kɛ o la abada.
Aw kana pikiri kɛ abada mura walima murafarigantɔ la.
Aw bɛka bana min furakɛ ni pikiri ɲɛci tɛ o la, aw kana a kɛ abada.
Aw kana pikiri kɛ abada ka a sɔrɔ aw ma pikirikɛlanw tobi fɔlɔ.
Aw kana pikiri kɛ abada ka a sɔrɔ aw ma a kɛcogo ɲɛdɔn ani ka a kɛli labɛnw sabati (pikirikɛlanw tobili ni fura kɛta hakɛ).
Aw kana pikiri kɛ abada ka a sɔrɔ aw ma bana sidɔn kosɛbɛ.