Sinkɔrɔkɛrɛdimi

Ale ye fogonfogondimi jugumanba ye. Sinkɔrɔkɛrɛdimi bɛ mɔgɔ minɛ ninakilidegunbana dɔw senfɛ walima u kɔfɛ, i n’a fɔ ɲɔni, keteketeni, murasɔgɔsɔgɔ, disidimi, sisan, walima banajugu wɛrɛ minnu bɛ mɔgɔ laada, kɛrɛn­kɛrɛnnenya la denfitiniw ni mɔgɔkɔrɔbaw. A ka ca a la fana, sinkɔrɔkɛrɛdimi ka teli ka sidabanakisɛ tigilamɔgɔw minɛ.

A taamasiɲɛw

• Nɛnɛ ni fariganba balalen
• Farigan (tuma dɔw la, sinkɔrɔkɛrɛdimi juguman ni farigan bɛ a senkɔrɔ, o bɛ denfitiniw ni mɔgɔkɔrɔbaw minɛ);
• Sɔgɔsɔgɔ karima min ɲɛ bɛ i n’a fɔ nɛrɛ, binkɛnɛ walima joli bɛ a la;
• Ninakili bɛ teliya ani ka mankan bɔ;
• Mɔgɔ bɛ gɔrɔntɔ ani a disi bɛ to ka mankan ka bɔ;
• Dimi bɛ kɛ disi la;
• Banabagatɔ fan bɛɛ bɛ a dimi.
• Joli bɛ bɔ ɲɛda ni dawolow la (sɛbɛn ɲɛ Sufɛfarigan).

Ni den bananenba don, ni a ninakili ka teli, a ka surun, o bɛ se ka kɛ sinkɔrɔkɛrɛdimi ye. Ni denfitini ka ninakiliko ka ca ni ninakiliko 60 ye miniti kɔnɔ, o bɛ a jira ko a ninakili ka teli. Den min bɛ kalo 2 ni san 1 cɛ, ni o ninakili tɛmɛna ninakiliko 50 kan, o kɔrɔ ko a ninakili ka teli, ni den bɛ san 1 ni san 5 cɛ, o ka kan ka ninakiliko 40 kɛ miniti kɔnɔ. Ni ninakili ka teli nka a ka surun, aw bɛ farilajidɛsɛ (sɛbɛn ɲɛ Farikolojidɛsɛ taamasiɲɛw) walima ninakili (sɛbɛn ɲɛ Ni ninakilidegun bɛ jali sen kɔrɔ) teliyali kun ɲɛɲini. Aw kana ninakiliko hakɛ jate waati min den bɛka kasi walima ni a ye a makun yɔrɔnin min.

A furakɛcogo:

• Ni aw sɔmina dɔrɔn ko sinkɔrɔkɛrɛdimi bɛ aw la, aw bɛ taa dɔgɔtɔrɔso la.
• Ni aw tɛ se ka taa dɔgɔtɔrɔso la, aw bɛ a furakɛ ni banakisɛ­fagalanw ye.
• Sani aw ka dɔgɔtɔrɔso lasɔrɔ, aw bɛ a furakɛ nin cogo la: penisilini, pénicilline, kotiri, cotrimoxazole, walima eritoromisini, érythromycine.
• Ni a ka jugu, aw bɛ porokayini penisilini, pénicilline procaïne pikiri kɛ. Ni baliku don, aw bɛ miligaramu 1000 kɛ tile o tile, walima aw bɛ amɔkisisilini, amoxicilline kunuta di banabagatɔ ma. Aw bɛ o miligaramu 500 di siɲɛ 3 tile o tile.
• Aw bɛ baliku ka tata hakɛ tila 4 walima 2 ye ka o di den ma. Ni den tɛ san 6 bɔ, amɔkisisilini (amoxicilline) de ka ɲi o ma.
• Aw bɛ dimimadafuraw asipirini (aspirine) walima asetaminofɛni (acétaminophène) ta walasa fari bɛ sumaya ani ka dɔ bɔ dimi na. Asetaminofɛni ka ɲi denw ma, den minnu tɛ san 12 bɔ.
• Banabagatɔ ka kan ka ji caman min. Ni a tɛ se ka dumunikɛ, aw bɛ sɔrɔmu minta di a ma (aw ye sɛbɛn ɲɛ Kɛnɛyaji lajɛ).
• Walasa ka sɔgɔsɔgɔ mada ani kari ka se ka bɔ, banabagatɔ ka kan ka a wusu ni jikalan ye (aw ye sɛbɛn ɲɛ Sɔgɔsɔgɔ furakɛcogo lajɛ). Kunsulicogo fana bɛ kari bɔli nɔgɔya (aw ye sɛbɛn ɲɛ Kari labɔcogo lajɛ).
• Ni a tigi ninakili ferekelen don, sisanfura bɛ se ka dɛmɛ kɛ (aw ye sɛbɛn ɲɛ Sisan furakɛli la lajɛ).

📖 Gafe kɔnɔkow
← Segin kɔfɛ | Taa ɲɛfɛ →