Disidimi

Disidimi ye fiɲɛ tɛmɛsiralabana ye. A ni sɔgɔsɔgɔ karima bɛ taa ɲɔgɔn fɛ. A bɛ se ka kɛ mura walima murasɔgɔsɔgɔ kɔlɔlɔ ye. O la, banakisɛ­fagalan takun tɛ. Aw bɛ banakisɛ­fagalanw ta ni bana taamasiɲɛw tɛmɛna dɔgɔkun 1 kan, walima ni sinkɔrɔkɛrɛdimi taamasiɲɛw yera (aw ye sɛbɛn ɲɛ nata lajɛ) walima ni fogonfogondimi basigilen bɛ a tigi la

Disidimi basigilen

A taamasiɲɛw:

• Sɔgɔ­sɔgɔ karima min mɛnna senna (kalo walima san).
• Waati dɔw la, sɔgɔsɔgɔ bɛ juguya, ani farigan bɛ kɛ a senkɔrɔ. Ni nin sɔgɔsɔgɔ suguya bɛ mɔgɔ dɔ la, nka bana basigilen wɛrɛ tɛ a la i n’a fɔ sɔgɔsɔgɔninjɛ walima sisan, o bɛ se ka kɛ disidimi basigilen ye.
• A ka teli ka baliku minɛ, baliku min mɛnna sigarɛtimin na.
• A bɛ se ka fogonfogondimi jugumanba banbali (emphysème) bila mɔgɔ la, bana min kɔnɔna na, ninakilidegun bɛ a tigi sɔrɔ, sango ni a ye farikoloɲɛnajɛ kɛ.

A furakɛcogo:

• Aw bɛ sigarɛtimin dabila pewu.
• Aw bɛ sisanfura ta salibitamɔli bɛ min na (salbutamol, sɛbɛn ɲɛ Salibitamɔli, salbutamol).
• Disisimi basigilen bɛ mɔgɔ minnu na, olu ka kan ka u yɛrɛ furakɛ ni ampisilini (ampicilline), kotirimɔkizazɔli, cotrimoxazole, walima ni amɔkisisilini, amoxicilline ye, ni murasɔgɔsɔgɔ don walima mura ni farigan bɛ a senkɔrɔ.
• Ni a ka gɛlɛn banabagatɔ bolo ka kari labɔ, aw bɛ a kun wusu ni jikalan ye (sɛbɛn ɲɛ Sɔgɔsɔgɔ furakɛcogo) ani ka a dɛmɛ ka a da a kɔnɔ kan ka a kun suli ka kari labɔ (sɛbɛn ɲɛ Kari labɔcogo).

Ni sɔgɔsɔgɔ basigilen bɛ aw la (walima ni aw b’a fɛ ka aw yɛrɛ tanga a ma), aw kana sigarɛti min.

📖 Gafe kɔnɔkow
← Segin kɔfɛ | Taa ɲɛfɛ →