Kolotugudadimi

A ka ca a la, mɔgɔkɔrɔbaw ka kolotugudadimi tɛ ban pewu, nka a dimi bɛ se ka mada:

• Lafiɲɛbɔ. Ni aw bɛ se, aw ye fangalabaaraw dabila olu de bɛ kolotugudaw degun. Ni kolotugudadimi ye farigan bila aw la, dumuni kɔfɛ, aw bɛ aw da ka sunɔgɔ.
• Aw bɛ fini su jikalan na ka o kɛ ka kolotuguda dimitɔw digidigi (gafe ɲɛ Finimugu kalaman dacogo).
• Fura dɔw bɛ yen i n’a fɔ asipirini (aspirine), olu bɛ dimi mada. A ka fisa ka asipirini gansan ta fo ka se kisɛ 6 ma tile kɔnɔ. Ni tulo tora ka mangan bɔ, aw bɛ dɔ bɔ a tata hakɛ la. Aw ye aw janto! Aw kana asipirini ta abada ni furudimi bɛ aw la. Asipirini talen kɔfɛ, walasa a kana aw furu jeni jeni, aw bɛ a ta dumuni kɛ waati ka ji caman min a kan walima nɔnɔ walima furudimifura jilama kutu ɲɛ kelen i n’a fɔ maalɔkisi (Maalox) walima zeluzili (Gelusil).
• A ɲininen don aw ka to ka kolotuguda dimitɔ bɔɲɔgɔn na dɔɔni dɔɔni.

Ni kolotuguda dimitɔ fununa, ka a kalaya fo ka farigan bila a tigi la, o bɛ a jira ko a ye nɛ ta; o la, aw bɛ banakisɛ­fagalan dɔ ta i n’a fɔ penisilini (pénicilline). O kɔfɛ, aw bɛ taa dɔgɔtɔrɔso la.

Denmisɛnniw na, kolotugudadimi bɛ se ka kɛ bana wɛrɛw taamasiɲɛ ye, i n’a fɔ kolotugudadimi jugumanba (aw ye gafe ɲɛ Kolotugundadimi (sɛbɛn ɲɛ 253) lajɛ) walima sɔgɔsɔgɔninjɛ (aw ye gafe ɲɛ Sɔgɔsɔgɔnijɛ lajɛ). Ni aw ye o ye denmisɛnni na, aw bɛ taa ni a ye dɔgɔtɔrɔso la.

📖 Gafe kɔnɔkow
← Segin kɔfɛ | Taa ɲɛfɛ →