Ɲɛdakololabanaw (la sinusite)

O ye dimi gɛlɛn walima dimi basigilen ye ɲɛdakɔnɔkolow la minnu bɛ ɲɛkisɛ lamini kolow la. A bana bɛ mɔgɔ minɛ tulodimi walima ngɔɔnɔdimi kɔfɛ walima mura juguman.

A taamasiɲɛw

• Dimi bɛ kɛ ɲɛ sanfɛla ni a dugumana la, (ni aw ye a gosi dɔɔni walima a tigi ye a kun biri, a dimi bɛ juguya.)
• Ji walima nɛ bɛ bɔ nu na tuma dɔ la min kasa ka go. Nu bɛ geren waati dɔw la.
• Tuma dɔw la a tigi fari bɛ kalaya.
• A ɲi dɔw bɛ a dimi tuma dɔw la.

A furakɛcogo

• Aw bɛ to ka ji caman min.
• Aw bɛ to ka ji kɔkɔma tonitoni aw nu na (sɛbɛn ɲɛ Nu gerenni ni nuji bɔli), walima aw bɛ aw nu wusu ni jikalan ye walasa ka a nɔgɔw labɔ (aw ye sɛbɛn ɲɛ Sɔgɔsɔgɔ furakɛcogo).
• Aw bɛ fini su jiwɔlɔkɔlen na ka aw ɲɛda digidigi ni o ye.
• Aw bɛ nudayɛlɛfura tonitoni aw nu na i n’a fɔ fenilefirini (neyozinefrini, néosynéphrine sɛbɛn ɲɛ Nudayɛlɛfura).
• Aw bɛ banakisɛ­fagalanw ta: anpisilini (sɛbɛn ɲɛ Kunfinnin ni amɔkisisilini, L’ampicilline et l’amoxicilline), tetarasikilini (sɛbɛn ɲɛ Tetarasikilini) walima penisilini (sɛbɛn ɲɛ Pikirimuguw, penisilini, pénicilline).
• Ni fura ninnu ma se ka a nɔgɔya, aw bɛ taa dɔgɔtɔrɔso la.

Yɛrɛtangacogo

Ni mura bɛ aw la walima aw nu gerennen don, aw ye aw jija a saniyalen ka to tuma bɛɛ.

📖 Gafe kɔnɔkow
← Segin kɔfɛ | Taa ɲɛfɛ →