Sigida 16 Ɲɛw
Ni ɲɛyeelendonda falakani wagasira, walima fiɲɛ ka a sɔrɔ banamisɛnni dɔ sababu la, o bɛ laban ni ɲɛyeelendonda dimiko jugu ye. Ni aw ye a lajɛ yeelen na ka ɲɛ, aw bɛna tiri finmanni dɔ ye ɲɛyeelendonda kan.
Ni o ma furakɛ, a bɛ laban ni fiyɛntɔya ye. Aw bɛ ɲɛdimituluni kɛ a la siɲɛ 4 don o don fo ka se tile 7 ma (sɛbɛn ɲɛ Ɲɛ furakɛli). Ni ɲɛ ma nɔgɔya tile 2 kɔnɔ, aw bɛ taa dɔgɔtɔrɔso la.
Ɲɛyeelendonda birintili tɛ mɔgɔ dimi, a bɛ tiri jɛman bila ɲɛyeelendonda kan. A sababu bɛ se ka kɛ ɲɛyeelendonda kan joli furakɛli ye, a jenini, walima joginni wɛrɛw fɛ. Ni ɲɛ 2 bɛɛ fiyɛnnen don, nka a tigi bɛ se ka yeelen ye, ɲɛ kelen opereli bɛ se ka to a tigi ka yeli kɛ. Nka o da ka gɛlɛn. Ni fiɲɛ bɛ ɲɛ kelen dɔrɔn de la ka sɔrɔ a tɔkelen ka ɲi, aw kana a opere. Aw bɛ aw jija ka ɲuman in lakana ka a kisi joginni ma.