Ɲɛjalandimi basigilen

Ɲɛjalandimi basigilen don min bɛ juguya dɔɔni dɔɔni. A bɛ se ka kalo caman kɛ walima san caman ka sɔrɔ a ma kɛnɛya. Ni a ma furakɛ joona, banabagatɔ ɲɛ bɛ se ka fiyen. Ale bɛ sɔrɔ bolokɔniw walima dimɔgɔw fɛ. A bana ka teli ka sɔrɔ sigida la, mɔgɔw ka ca yɔrɔ min ni sɔrɔ ma labɔli kɛ.

A taamasiɲɛw

• Ɲɛjalandimi basigilen bɛ daminɛ ni ɲɛ bilenni ni ɲɛjibɔ ye i n’a fɔ ɲɛjalandimi gansan.
• Kalo kelen walima kalo caman kɔfɛ, kurukuru bilenni caman bɛ falen ɲɛfara kɔnɔ minnu bɛ wele folikili (follicules) tubabukan na. Walasa ka u ye, aw bɛ ɲɛfara kɔrɔta, i n’a fɔ ja in bɛ a jira cogo min (sɛbɛn ɲɛ Nɔgɔ bɔcogo ɲɛ na lajɛ.)
• Ɲɛjɛ bɛ minɛ ka funu dɔɔni.
• Kalo damadɔ kɔfɛ, ni aw ye ɲɛ kɔlɔsi ka ɲɛ walima ka a filɛ ni lupu ye min bɛ fɛnw bonya, aw bɛ a ye ko ɲɛjɛ bilennen don barisa jolisiramisɛnni kura caman bɛ bɔ a la panikili (les pannicules).
• Ni kurukuru bilenmanw ni ɲɛjɛ bilennen ye ɲɔgɔn sɔrɔ ɲɛ na, o bɛ a jira ko ɲɛjalandimi basigilen don.
• 
• San caman kɔfɛ, o kurukuru bilenmanw bɛ a daminɛ ka ci, ka laban ka kɛ jolifɔnmisɛnni jɛmanw ye.

O jolifɔn ninnu bɛ ɲɛfaraw girinya min bɛ se ka ɲɛw yɛlɛli gɛlɛya.

Walima u bɛ se ka ɲɛsiw bin ɲɛ kɔnɔ, ka joli bila ɲɛjɛ la, min bɛ laban fiyentɔya ma.

A furakɛcogo

Aw bɛ kalo kelen kɛ ka tetarasikilini (tétracycline) walima eritoromisini 1% (érythromycine) (ɲɛdimituluni) kɛ ɲɛ na siɲɛ 3 tile kɔnɔ. Ani fana aw bɛ se ka tetarasikilini (tétracycline) 3%, walima eritoromisini kɛ a la siɲɛ 1 tile kɔnɔ. Walasa bana in ka furakɛ ka ɲɛ, aw ka kan ka furakisɛ dɔw ta siɲɛ 2 walima siɲɛ 3 tile kɔnɔ fo dɔgɔkun 2 walima 3. O furaw ye tetarasikilini, tétracycline kisɛ walima eritoromisini, érythromycine walima silifamidi, sulfamides.

Banakunbɛn

Ɲɛjalandimi basigilen furakɛli a tuma na o bɛ a bali ka jɛnsɛn ka yɛlɛma mɔgɔ tɔw fɛ. Mɔgɔ o mɔgɔ ni ɲɛjalandimitɔ bɛ ɲɔgɔn kan, sango denmisɛn o tigiw ka kan ka to ka taa u ɲɛw lajɛ dɔgɔtɔrɔso la tuma ni tuma. Ni ɲɛjalandimi taamasiɲɛ yera u la, aw ka kan ka a furakɛ teliya la. Ani fana aw ka aw ɲɛda ko don o don walasa ka bana yɛlɛmani bali. A nafa ka bon kosɛbɛ ka Saniya matarafali sariya kunbabaw labato minnu ɲɛfɔlen don sigida 12 kɔnɔ.

Saniya matarafali bɛ ɲɛjalandimi basigilen bali ka jɛnsɛn.

📖 Gafe kɔnɔkow
← Segin kɔfɛ | Taa ɲɛfɛ →