Sigida 3 Banabagatɔ lajɛcogo
Tulow: Aw ye jateminɛ kɛ ni dimi bɛ tulo kɔnɔ walima ni aw ye tulo sama ni a bɛ a tigi dimi kojugu, o ye tulolabana taamasiɲɛ ye. Ni aw ye tulo sama ni dimi bɛ a la o ye bana taamasiɲɛ ye tulowo kɔnɔ (aw ye sigida Tulolabanaw lajɛ).
Aw ye jateminɛ kɛ taamasiɲɛw na minnu bɛ a jira ko nɛ walima dimi bɛ tulowo kɔnɔ.
Aw bɛ se ka tulo kɔnɔna lajɛ ni tɔrɔsi fitini dɔ ye, nka aw kana kala, alimɛtikisɛ walima ɲinsɔkɔbɛkala don tulo kɔnɔ abada.
Aw ye a jateminɛ fana ni banabagatɔ bɛ mɛnni kɛ ni a tulo kelen ye ka tɛmɛ kelen kan.
Aw ye aw hakili to a la tuma bɛɛ ka den kumabali tulo lajɛ ni a tɛ a dimi, kɛrɛnkɛrɛnnenya na waati min farigan ni mura bɛ a la. A ka ca a la o waatiw la den bɛ kasi kojugu ka a sababu kɛ dimi gɛlɛn ye.
Kankɔnɔna ni Dakɔnɔna: Aw ye dakɔnɔna ni kankɔnɔna lajɛ ni tɔrɔsi fitini dɔ ye walima tile kɔrɔ. Walasa ka dakɔnɔna lajɛ, aw bɛ kutu dɔ kala da nɛn sanfɛ ka a lajigin walima aw ka a ɲini banabagatɔ fɛ a ka fɔ “ahhhh…” Aw ye a lajɛ ni kankɔnɔna bilennen tɛ ani fana ni kankɔnɔjuruninw fununen tɛ walima ni nɛ bɛ a yɔrɔ dɔw la (Aw ye sɛbɛn ɲɛ Nkɔɔnɔdimi lajɛ). Aw ye dakɔnɔna jateminɛ ni dimi tɛ ɲitara la, ni joli tɛ dakɔnɔ, ni dimi tɛ nɛn na, ni ɲi dɔw tolilen tɛ, ni nɛ walima bana wɛrɛ tɛ u la. (Aw ye sigida Sigida 17 Ɲinw, ɲintaraw ani dakɔnɔna kalan).
Nu: Nuji bɛ bɔ walima nu gerennen don wa? (aw ye jateninɛ kɛ den ninakilicogo la). Aw ye yeelen jɔ nu kɔnɔ ka a lajɛ ni falaka, nɛ, ani joli tɛ a kɔnɔ. Aw ye a lajɛ fana ni a bilennen tɛ, ni a tɔnnen tɛ walima ni a kasa tɛ bɔ. Aw ye a sɛgɛsɛgɛ ni mura basigilen walima binjalanmura tɛ banabagatɔ in na (sɛbɛn ɲɛ Ɲɛdakololabanaw).