Ɲɛkisɛw

Aw ye ɲɛkisɛ jɛman jateminɛ ni a bɛ a cogo la walima ni a bilennen don walima ni a kɛlen don nɛrɛmuguman ye. Aw ye jateminɛ kɛ fana ni yɛlɛma bɛ ɲɛ filɛlicogo la.

Aw ye a ɲini banabagatɔ fɛ a ka a ɲɛkisɛ layɛlɛ sanfɛ, ka a lajigin duguma, ani ka a lataa kɛrɛ ni kɛrɛ la. Ɲɛkisɛ basigibaliya ni a yɛlɛmayɛlɛmacogo bɛ se ka kɛ kunsɛmɛnabana dɔ ye.

Aw ye ɲɛ finman cogoya lajɛ. Ni aw ye a ye ko a ka bon kosɛbɛ, o bɛ se ka kɛ jatigɛ ye (aw ye sɛbɛn ɲɛ Kirinni lajɛ). Nka ni a ka dɔgɔn kosɛbɛ o fana bɛ se ka sɔrɔ bagamafɛn walima furakisɛ suguya dɔw tali ye banabagatɔ fɛ. Ni a yɔrɔ jɛlen don, o bɛ ɲɛkanfalaka walima kansɛribana kofɔ (aw ye sɛbɛn ɲɛ Ɲɛkanbugun lajɛ).

Aw ye ɲɛkisɛ fila sanga ɲɔgɔn ma, aw ka jateminɛ kɛ danfara la u fila ni ɲɔgɔn cɛ; kɛrɛn­kɛrɛnnenya na ɲɛ finman kɛcogo:

Ni aw ye a kɔlɔsi ko banabagatɔ ɲɛkisɛ finman kelen ka bon ni kelen ye, aw bɛ taa ni a ye dɔgɔtɔrɔso la joona.

• Ɲɛkisɛ min finman ka bon ni dimi bɛ o la kosɛbɛ, ni a yɔrɔ ka gɛlɛn ani ni o tɔɔrɔ bɛ banabagatɔ lafɔɔnɔ, o bɛ ɲɛdimi dɔ kofɔ min bɛ sɔrɔ tansiyɔnbana fɛ ani a bɛ se ka laban fiyentɔya la (sɛbɛn ɲɛ Ɲɛnatansiyɔn lajɛ).
• Ɲɛkisɛ min finman ka dɔgɔn ni dimi bɛ o la kosɛbɛ o ye bana ye ɲɛmɔgɔni na min kasaara ka bon kosɛbɛ (sɛbɛn ɲɛ Ɲɛmɔgɔninabana lajɛ).
• Mɔgɔ min kirinnen don walima mɔgɔ min ye kasaara sɔrɔ ni o tigi ɲɛkisɛ finman kelen ka bon ni kelen ye, o bɛ se ka a jira fana ko fiɲɛ bilala kunsɛmɛ na (sɛbɛn ɲɛ Kunsɛmɛnabanaw lajɛ).

Mɔgɔ min kirinninen don walima mɔgɔ min gosira a kunkolo la aw ye o tigi ɲɛkisɛ fila finman jateminɛ tuma bɛɛ ni kelen man bon ni kelen ye.

📖 Gafe kɔnɔkow
← Segin kɔfɛ | Taa ɲɛfɛ →