Wololabanaw

Nin bana in bɛ sɔrɔ Farafinna sahɛli jamanaw de la. Banakisɛ bɛ sɔrɔ cɛncɛn na dimɔgɔ dɔw de fɛ. A bɛ kɛ kuru gɛlɛn bileman ye mɔgɔ sogo kɔrɔ. Ni dimɔgɔ in ye mɔgɔ min kin, a bɛ bana bila o tigi la.

Bana in suguya dɔ bɛ yen o bɛ fiɲɛ bila mɔgɔ farisogo kɔrɔ. Ale dɔnni ka gɛlɛn, a furakɛ man di wa a da ka gɛlɛn. Ni aw bɛ se, aw ye dɔgɔtɔrɔ dɔ ka dɛmɛ ɲini.

A suguya wɛrɛ bɛ yen, o ka jugu kɛrɛn­kɛrɛnnenya la mɔgɔ wolo de ma (wololabana, a bɛ joli bila mɔgɔ la). Ale furakɛ ka di.

A bɛ taamasiɲɛ minnu bɛ yemɔgɔ wolo la:

• Dɔgɔkun 2 fo 8 dimɔgɔ ka kinni kɔfɛ, kinnida in bɛ funu.
• O funu bɛ kɛ joli ye, wa a ka ca a la nɛ bɛ kɛ a la.
• Joli ninnu bɛ kɛnɛya u yɛrɛ ma, nka u bɛ se ka dɔgɔkun caman kɛ fo ka se san 2 ma.
• Joli ninnu juguya ka di kosɛbɛ (banakisɛ fɛ)

A furakɛcogo:

• Aw bɛ joliw saniya ni ji wulilen min sumalen don.
• Aw bɛ finimugu dɔ su jikalan na ka o da joli la miniti 10 fo ka se miniti 15 ma. (aw kana a kalaya fo a ka aw wolo jeni).
• Aw ye o kɛ siɲɛ 2 tile kɔnɔ, fo ka se tile 10 ma. Tuma dɔw la nin furakɛli cogoya in bɛ se ka a kɛnɛya fo ka a ban. A nɔ dɔ bɛ to.

📖 Gafe kɔnɔkow
← Segin kɔfɛ | Taa ɲɛfɛ →