Sɛgɛlɛn

Sɛgɛlɛn ye tumu janmanjan misɛman ye min bɛ balo mɔgɔ wolo kɔrɔ ani min bɛ joli juguw bila mɔgɔ senkuruba la, a senkala walima a fari fan wɛrɛ la. A tumu jɛlen don i n’a fɔ gaari, wa a janya bɛ se ka mɛtiri 1 bɔ. Sɛgɛlɛn bɛ sɔrɔ farafinna fan caman na.

Nin ja in bɛ a sɔrɔ sababuw ɲɛfɔ:

A taamasiɲɛw:

• Senkuruba, senkala, cɛyakisɛw walima fari fan wɛrɛ bɛ funu ka a tigi dimi.
• Dɔgɔkun kelen kɔfɛ, yɔrɔ kofɔlen bɛ ci ka kɛ joli ye. A ka ca a la o bɛ a tigi sɔrɔ taama na walima koli la. Sɛgɛlɛn kun bɛ ye joli la.
• Ni joli nɔgɔra ani ka juguya, dɔ bɛ fara a dimi ni a funu kan, o bɛ gɛlɛya don taama na. Tuma dɔw la nɛgɛtigɛbana bɛ don a senkɔrɔ (aw ye gafe ɲɛ Tetanɔsi (Jaŋɔyin / nɛgɛtigɛbana) lajɛ).

A furakɛcogo:

• Aw bɛ joli ko ka a jɛ ka aw jija a saniyalen ka to. Aw bɛ aw sen bila jisuma na walasa tumu ka a kun bɔ.
• Aw bɛ juruni dɔ siri tumu na, walima aw bɛ a meleke kalamani dɔ la ani ka to ka a sama dɔɔni dɔɔni don o don. A samani bɛ se ka taa dɔgɔkun kelen na walima min ka ca ni o ye. Tumu in janya bɛ se ka taa mɛtiri 1 na. Aw kana aw yɛrɛ bila a yɔrɔ farali la barisa o bɛ se ka a joli juguya.
• Aw metoronidazɔli (métronidazole) walima cabɛndazɔli (thiabendazole) di a tigi ma walasa ka dɔ bɔ dimi na ani ka tumu bɔli nɔgɔya. (Nin fura ninnu tɛ tumu in faga. Walasa ka fura tata hakɛ dɔn, aw ye gafe ɲɛ Metoronidazɔli, Métronidazole ni Cabɛndazɔli, Thiabendazole lajɛ.)
• Aw bɛ tetanɔsi boloci kɛ a tigi la (aw ye gafe ɲɛ Tetanɔsifura (nɛgɛtigɛbanafura) lajɛ).
• Ni joli juguyara (a dimi ka bon, a bilennen don, a fununen don ka farigan bila a tigi la), aw bɛ penisilini (pénicilline), dikulɔkisisilini (dicloxacilline) walima banakisɛ­fagalan wɛrɛ di a tigi ma (aw ye gafe ɲɛ Pikirimuguw (penisilini, pénicilline) lajɛ).

Yɛrɛtangacogo:

• Aw bɛ aw jija aw ka ji minta ka bɔ orobinɛ na. Ni aw ka sigida ka jitayɔrɔ ye kelen ye, aw kana sin ka a min ten. Aw bɛ a sɛnsɛn ni nilɔntɛmɛ walima fini sanuman ye sani aw ka a don jidaga la. Sɛnsɛnni bɛ a to fɛnɲɛnamaniw tɛ jigin daga kɔnɔ.

• Sigida mɔgɔ bɛ se ka jiginjiginna dɔ labɛn jitayɔrɔ la walasa mɔgɔ senkana kana don ji la.

• Walima u bɛ se ka jitayɔrɔ in labɛn i n’a fɔ kɔlɔn ani ka jitajuru bila a da la.

Ni mɔgɔ sen tɛ don jitayɔrɔ jiw la walima ka a ko o ji mintaw la, a ka ca a la bana in tɛna mɔgɔw minɛ, wa o bɛ kɛ sababu ye ka bana in tunu aw ka sigida la.

📖 Gafe kɔnɔkow
← Segin kɔfɛ | Taa ɲɛfɛ →