Den banabagatɔ ni ladonko nɔgɔman ka kan

I n’a fɔ i bɛ sɔnkan ɲini baliku fɛ cogo min na o furakɛli la, den fana furakɛko ɲuman bɛ kɛ n’a nɛgɛn-nɛgɛnni ye a ka sɔn furakɛli ma. Den nɛgɛnni ka sɔn furakɛli ma tɛ ɲɛ muɲu ni timinandiya kɔ. Fɔ i ka kɛ mɔgɔ nɔgɔman ani mɔgɔ ɲuman ye. Kan’a fɔ ko sɔgɔli tɛ n’a dimi walima ko fura kunaman ka timi. Ni den dara i la nɛgɛnni na, a tɔ bɛ sɔn i ka lajɛliw ma nɔgɔya la. A b’i ka ɲininkaliw jaabi ka tila k’a yɛrɛ sendon a yɛrɛ ka furakɛli la.

Fɛɛrɛ wɛrɛw bɛ yen den nɛgɛnni na ka furakɛli kɔnɔgan bɔ a dusu la:

Bɛrɛbɛrɛli ye furaw ladumanba ye denw ma.

• Sani i ka maga den na, i b’a nisɔndiya­kumaninw bila a la fɔlɔ. O furancɛ kɔnɔ, i b’i jija k’a yecogo jateminɛ. I b’i yɛrɛ ɲininka yala a ka kɛnɛ a yecogo fɛ wa? Yala a bɛ ka ninakili bɔ koɲuman wa? Yala fɛn tɛ a golo yecogo la wa?
• N’i bɛ na dusukun mankan­jateminɛnan ta walima ka farikalaya­jateminɛnan ta a kama, i b’o minɛn ninnu baarakɛcogo ɲɛfɔ a ye fɔlɔ a kana na siran olu ɲɛ.
• A ba, a mɔmuso walima mɔgɔ wɛrɛ min bɛ ka a ladon, i bɛ o tigi bila k’a minɛ o ka siran bɔ a dusu la. N’ i bɛ se, furakɛli fɛn o fɛn ka kan ka kɛ i bɛ o kɛcogo ɲɛfɔ den ladonbagaw ye.
• Ni dimi bɛ den min kan, i bɛ parasetamɔli (asetaminofɛni) di o ma. O tɛ na bana sun furakɛ. Nka tuma dɔ la, den bɛ se ka dumuni kɛ, ka ji min ani k’a daminɛ ka kɛnɛya n’i ye dimimadafura di a ma; ɲɛ asetamino­fɛni, acéta­mino­phène lajɛ walasa ka faamuya sɔrɔ fura hakɛ sumani cogoya kan.
• Furakɛli minnu tɛ taa dimi kɔ ani fura minnu tali man nɔgɔn, i b’olu kɛli to i ka furakɛli labantumaw la.

📖 Gafe kɔnɔkow
← Segin kɔfɛ | Taa ɲɛfɛ →