Kɛnɛya tigilamɔgɔw tɔgɔlakibaruya

N’i mɔgɔ min ye kɛnɛya tigilamɔgɔ ye, i bɛ taa bɔ denmisɛnw na ka caya. O lajɛli in kɛtuma nɔgɔman ye den ka boloci donw ye (sɛbɛn ɲɛ Boloci), walima kalo fila o kalo fila san fɔlɔ la ni ka sɔrɔ k’a tɔ kɛ siɲɛ kelen ye san o san o kɔ fɛ.

I ka lajɛli bɛ caya ni bana fari bɛ den na waati minnu na, i n’a fɔ den mɔni sumayali. I ka kan ka segin (walima k’a fɔ denba ye k’a ka na i fɛ yen ni den ye) ka na den lajɛ a furakɛli kɔ fɛ k’a dɔn ni den bɛ k’a yɛrɛ sɔrɔ walima n’a mako bɛ furakɛli la halisa.

Hali n’a y’a sɔrɔ ko a ka nɔgɔ denbaw ka na ni u denw ye dɔgɔtɔrɔ fɛ yen a k’u lajɛ, dɔgɔtɔrɔ yɛrɛ ka kan k’a bɔ a yɛrɛ la ka na bɔ a ka banabaatɔw ka so tuma kelen kelen na. Denyɛrɛninw walima den kɔrɔbaw mabɔli dɔgɔtɔrɔso banabagatɔ wɛrɛw la, o de ɲɔgɔn tɛ. A Fana, denba dɔw wulili man nɔgɔ ka bɔ u den tɔw kɔrɔ walima u ka baara kɔrɔ. O denba ninnu tɛ na dɔgɔtɔrɔso la. A sugu la, kɛnɛyatigilamɔgɔ de ka kan k’a janto o muso ninnu denyɛrɛninw n’u den kɔrɔbaw lajɛli la.

I mako bɛ den minnu kɔlɔsili la kosɛbɛ olu ye minnu tɛ ye i fɛ ka caya ye.

Komin den bɛ ka mɔ ka taa a fɛ, i bɛ tɛmɛ ni a lajɛli ye. A lajɛli sen fɛ:

I bɛ ɲininkali kɛ den tun bɛ cogo di – n’a tun ka kɛnɛ ani n’a bɛ ka mɔ a ɲɛ ma.
I bɛ den lajɛ ka bɔ a kunkolo la ka na fo a senkɔnin na. Den kɛnɛman sɔmi ka teli ani a timina ka di. A golo yecogo ka ɲi ani a fari bɛ ka mɔ ni ka kɔkɔ.
I bɛ ɲininkali kɛ ni den bɛ dumuni kɛ koɲuman. I bɛ denba ladi ka kɛ sin dili ɲuman na ani dumuni nafamaw dilali la.
I bɛ den girinya hakɛ ta k’a lajɛ. Walima ni ba sen bɛ denkɔlɔsi baara dɔ la, i b’a fɔ k’a k’o sɛbɛn d’i ma i k’o lajɛ (i n’a fɔ mɔni kɔlɔsilisɛbɛn dɔ: misali la Den ka kɛnɛya kɔlɔsilisɛbɛn walima i bɛ se ka sɛbɛn o sɛbɛn sɔrɔ ba bolo den ka kɛnɛya kan).
I bɛ den fari jɛlenya jateminɛ ani n’a dayɔrɔ ka ɲi. I ka lajɛli ninnu bɛ kɛ sababu ye i ka denbaya kalan yɛrɛkɔlɔsi ni yɛrɛ tangali fɛɛrɛw la ka kisi banaw ma. A fana bɛ se k’a to i k’a dɔn u mako bɛ dɛmɛ sugu min na k’u ka du lakana kɛnɛya sira kan.
A kɛ cogo bɛɛ la i k’i ka dɔnta don du mɔgɔw ni denba la kɛnɛya siratigɛ la.

Denw ladonni bɛ kɛ sababu ye kɛnɛya tigilamɔgɔw bolo ka sigidamɔgɔw ka dannaya n’u ka bonya sɔrɔ. Denmasaw ɲɛ b’i la k’u denw furakɛ minkɛ, u bɛ da i la k’u yɛrɛ kunkanbanaw ɲininkaliw kɛ i la. N’i bɛ to ka na den min ka kɛnɛya n’a mɔcogo lajɛ sɔn ni sɔn, o ye sira ɲuman ye ka denba ni dukɔnɔmɔgɔw tɔw kunkangɛlɛyaw dɔn kɛnɛya sira kan ani k’u ka dannaya sɔrɔ.

I bɛ i to o la ka waati kungurunni kɛ denmisɛnw kalanni na kɛnɛya kan. Denmisɛnw b’u ka fɛn dɔnnen bɛɛ lakali u ka mɔgɔw ye ani u denmisɛnɲɔgɔn bɛɛ ye. U ye kɛnɛya kunnafoni jɛnsɛnni fɛɛrɛ ɲumanba ye sigida la.

📖 Gafe kɔnɔkow
← Segin kɔfɛ | Taa ɲɛfɛ →