Sigida 21 Denmisɛnw Ladonni
Den kɔrɔyatɔla bɛ faamuya dɔ sɔrɔ ka a ka fɛn kalannenw na ka taa a fɛ. A bɛ na dɔnniya ni bolojolenya minnu sɔrɔ a ka kalansolataa nafa ye o bɛ se ka kɛ sababu ɲuman ye a ma a ka se ka ko caman sidɔn ka ko caman fana waleya diɲɛ latigɛ la kɔ fɛ. Kalansolataa nafa ka bon.
Nka den b’a ka faamuya caman sɔrɔ so kɔnɔ, foro kɔnɔ, walima bɔlɔn kɔnɔ. A bɛ faamuya sɔrɔ filɛli sen fɛ, lamɛnni sen fɛ ani ka to ka mɔgɔ tɔw ta kɛlen ladege. A tɛ faamuya bɛrɛ sɔrɔ ka bɔ mɔgɔw ka fɔnɲɛna na ka mɔgɔw ka kɛtaw ladegeli bɔ. Den ka jogo tataw la fanba dɔw ye – mɔgɔɲumanya, kotigiya, ani ɲɔgɔnsɔn – a tɛ se ka minnu sira minɛ fiyewu n’u misali ɲumanw tɛ ka kɛ a ɲɛ kɔrɔ.
Den ka mɔgɔya kalan sɔrɔli bɛ kɛ a sen fɛ. A ka kan ka kow kɛcogow n’u ɲɛnabɔcogow kalan a yɛrɛ ye hali ni a bɛ filiw kɛ kɛ a kɔnɔ ka taa. Ni den ka dɔgɔn kosɛbɛ, i b’a lakana fɛnjuguw ma. Nka n’a bɛ ka kɔrɔbaya ka taa, i b’a dege a ka se a jantocogo la a yɛrɛ la. I b’a ka yɛrɛya wali kotigiya to a bolo ko dɔw la. I bɛ to ka sɔn a ka hakilina dilen dɔw ma hali n’a y’a sɔrɔ u b’i ta dilenw sɔsɔ.
Ni den ka dɔgɔn, a miiri tɛ kɛ dɔ wɛrɛ la a yɛrɛ magow kɛli kɔ. Kɔsa fɛ, a bɛ sɔrɔ ka bɔ a kala ma ko mɔgɔ ka kan k’i mɔgɔɲɔgɔn tɔw dɛmɛ ani ka kow kɛ u ye. I bɛ to ka denmisɛnw fo u ka dɛmɛniw na ni ka a jira u la ko ye ko ɲuman ye.
Den minnu ja la ka gɛlɛn olu bɛ ɲininkali caman kɛ. Ni masaw, karamɔgɔw ani tɔw bɛ to ka waati kɛrɛnkɛrɛn ta k’u ka ɲininkaliw jaabi ni dusukunjɛlenya ye ani faamuyacogo ɲuman na – ani ka to k’a fɔ u ye k’u t’a dɔn n’u tɛ ko min sidɔn – o bɛ ɲininkali kɛli nege to den na tuma bɛɛ. Ni den kɔrɔyara n’o hakilidayɛlɛn sugu ye, a ka teli k’a ka sigida kow ɲɛnabɔ ka a kɛ sigiyɔrɔ ɲuman ye.