Kɛcogo wɛrɛ minnu bɛ denmisɛnw ka kɛnɛya makarali la

I bɛ denmisɛnw ɲinw tanga bana ma n’u ɲinw jɔɔsili ye. Kana datimiyalanw d’u ma i n’a fɔ bɔnbɔn ni a ɲɔgɔnnaw, walima minfɛn timimanw. Sɛbɛn ɲɛ Balo nafantanw lajɛ o kunnafoni kan.
Sin dili: n’i bɛ dumuni ni minfɛn wɛrɛw di, i b’u kɛ minɛn jɛlenw kɔnɔ walima kutu jɛlenw. I kana sɔn u kɛli la butelimafɛnw kɔnɔ, olu minnu sanuman sɔrɔli ka gɛlɛn.
Kana a to denmisɛn banabaatɔw walima joli bɛ minnu na, kaba, nkaranga walima cicilikaba bɛ minnu na olu ni denmisɛn kɛnɛmanw ka jɛ dalan kelen walima u ka jɛ fini kelen walima farijisusalan kelen na. I b’i teliya o bana ninnu furakɛli fɛ barisa u yɛlɛmani ka ka teli denmisɛnw ni ɲɔgɔn cɛ ka taa.

I bɛ sankesiri matarafa walasa ka sosow gɛn. I bɛ jisigiyɔrɔw lajo walima ji yɛrɛ walasa ka sosow bali bugunni na u la. I bɛ da yɛlɛnnenw tugu ani ka sosobɛnnanw bunbun fɔlɔwow la.

I bɛ sokɔnɔlɛw donyɔrɔ janya so la, ka wuluw ni shɛw mabɔ mɔgɔw la walasa mɔgɔw ka tanga u n’u ka banakisɛw ma.
Ni kɔnɔnatumuɲinma (Ankylostome) don, denmisɛnw ka kan ka sabaraw don ka sennankolontaama dabila.
Ni kɔnɔnatumuni (Ascaris) bɛ denmisɛnw na, i bɛ tumufaalanw d’u ma kalo 6 o kalo 6, k’a daminɛ u san 1 na. Ɲɛ Tumufuraw lajɛ furaw n’u sumacogow ɲɛfɔlen don yɔrɔ min na.